Наталля Трафімава: Адкрыты ліст — гэта як апошні крык

Пра гэта ў размове з Еўрарадыё расказала ініцыятар ліста, капітан жаночай зборнай Беларусі па баскетболе Наталля Трафімава:

“Нас ужо тут пачынаюць абвінавачваць у непатрыятызме. Я не ведаю, як патлумачыць людзям, што гэта ўжо проста як апошні крык: “Паглядзіце, у нас сапраўды з гэтым праблемы!”. Як кажуць, надзея памірае апошняй,  і мы будзем чакаць да канца”.

Нагадаем, у адкрытым лісце ў Федэрацыю баскетбола беларускія спартсменкі заявілі, што адмовяцца выступаць за зборную, калі не палепшыцца сітуацыя з умовамі трэніровак. Таксама яны патрабавалі палепшыць экіпіроўку — выдаваць яе загадзя і ў адпаведнасці з надвор'ем.

Наталля Трафімава: “Умовы, у якіх мы трэніруемся, сапраўды, скажам так, не вельмі зручныя. Хацелася б прыходзіць на трэніроўку і ні пра што не думаць, заняцца канкрэтна сваёй працай. Форму нам выдалі амаль у апошні дзень перад ад’ездам, калі ў нас проста не было часу яе падправіць... І калі мы выступаем увосень, то навошта нам спадніцы — нам патрэбная куртка! Нам трэба дабірацца да залы, нам таксама трэба выйсці на вуліцу, мы не сядзім увесь час у зале”.

Як кажа капітан жаночай зборнай, чуць абвінавачванні ў непатрыятызме крыўдна. Дый клапоцяцца спартоўкі больш не пра сябе, а пра моладзь, якой даводзіцца трэніравацца ў дрэнных умовах:

“Хто мяне можа папракнуць, калі я прыязджаю ў зборную з траўмай і ўсё адно выходжу на пляцоўку і гуляю за Беларусь? Хаця я магла спакойна сабе зрабіць аперацыю і аднавіцца да наступнага сезону. Для нас сапраўды гонар выступіць за Беларусь, паказаць, што мы сапраўды ўмеем гуляць, што ў нас у краіне ёсць баскетбол.

Мы ўжо ў такім узросце, што нам засталося гуляць літаральна пару год. Але ў нас ёсць моладзь, мы хочам сыйсці і каб пасля нас штосьці засталося. Для гэтага усё робіцца”.

Тым часам федэрацыя абяцае пакараць вінаватых у скандале з баскетбалісткамі. Як паведаміў Еўрарадыё першы намеснік старшыні Беларускай федэрацыі баскетболу Валеры Гарэлікаў, да адкрытага ліста яны паставіліся з разуменнем:

"Ніякай агрэсіі у нас няма. І ў кіраўніка, і ў членаў федэрацыі ёсць кантакт са зборнай і выразнае разуменне праблемы… Учора кіраўнік федэрацыі зачытаў ліст перад чальцамі выканкаму Федэрацыі баскетболу, прапанаваў разабрацца… Мы будзем чакаць сустрэчы на ўзроўні Нацыянальнага алімпійскага камітэту, Міністэрства спорту і турызму і Федэрацыі баскетболу. І разбірацца — хто вінаваты".

Спадар Гарэлікаў паскардзіўся на недахоп фінансаў, назваўшы гэта адной з асноўных прычын:

“Можна размаўляць пра што заўгодна, няма межаў для дасканаласці. І па экіпіроўцы, арганізацыі вучэбна-трэніровачнага працэсу, фінансаванні каманды і г.д. Але трэба адэкватна ўспрымаць рэчаіснасць. У нас няма грошай, каб вырашаць пытанні, якія павінны вырашацца з зусім іншым фінансаваннем.

Трэба разумець, што ў краіне ёсць напэўна праблемы і больш сур’ёзныя — з аднаго боку, а з другога боку —  тая праца, якая праводзіцца, павінна праводзіцца не за месяц да пачатку чэмпіяната свету і не праз месяц пасля чэмпіянату свету. А круглы год усімі зацікаўленымі бакамі”.