Наведвальнікі “Басовішча-2013” усё ж атрымаюць бясплатныя візы

Турагенцтва “Дэльфін-Груп” усё ж дамовілася з польскай амбасадай у Беларусі пра візавую падтрымку наведвальнікаў “Басовішча-2013”.

“Бясплатныя візы будуць толькі для тых, каму да 25 гадоў, — тлумачыць умовы кіраўнік агенцтва Алесь Дуко. — Старэйшыя за 25 мусяць заплаціць консульскі збор у 60 еўра. Таксама абавязковая ўмова для атрымання візы — бас-тур нашага агенцтва. Па часе мы ўсё паспяваем, але на падрыхтоўку неабходных дакументаў засталося толькі два дні — 9-10 ліпеня”.

Бас-тур на “Басовішча-2013” каштуе 60 еўра. Апроч наведвання самога фестывалю ды вяртання дамоў, “Дэльфін-Груп” плануе наведаць радзіму Кастуся Каліноўскага (Мастаўляны), зладзіць невялікую экскурсію па Беластоку часоў паўстання 1863 года, і, безумоўна, невялікі шопінг.

Для візы патрэбныя пашпарт ды яго ксеракопія, запоўненая на сайце консульства і падпісаная анкета (каляровая і са штрых-кодам), фота, страхоўка, ды абавязковае пацвярджэнне валодання фінансавымі сродкамі на час паездкі. Віза даецца на чатыры дні, на кожны дзень неабходна мець па 100 долараў, наяўнасць якіх мусіць быць пацверджаная даведкай з месца працы, выпіскай з банкаўскага рахунка ці трэвэл-чэкамі.

Дакументы прымаюцца 9 ліпеня да 19.00, 10  ліпеня да 18.00. Віза дзейная з 18 па 21 ліпеня, мэта — культура.

Запісацца на бас-тур можна па тэлефонах +375297089518, +375447104368, +375333516525.