Невядомы ў Новай Баравой пагражаў сям'і пісталетам

На відэа з Новай Баравой, якое з'явілася ў сетцы, мужчына ў спартыўным касцюме пагражае людзям прадметам, падобным на пісталет, а затым б'е нагой у жывот мужчыну і ўводзіць з сабой маладую жанчыну.

Мужчыну пазней таксама забралі невядомыя, распавяла "Нашай Ніве" ягоная жонка Вікторыя. Сям'я жыве ў Новай Баравой. Учора ўвечары яны разам з сямігадовым сынам выйшлі пагуляць. Дзіця бегаў вакол елкі з ліхтарыкам. Бацька сямейства Віктар Мароз спыніўся пагаварыць са знаёмым.

"І тут я бачу сітуацыю: бяжыць дзяўчына, за ёй бягуць двое мужчын, гэта ўсё выглядае як напад", — распавядае Вікторыя.

Яна паспрабавала спыніць тых, хто нападаў, крыкнула ім "Вы што робіце? Вы хто такія? Што адбываецца?". Дзіця спалохалася і схавалася пад елкай. Яе муж таксама паспрабаваў умяшацца — звярнуўся да аднаго з тых, хто нападаў, з просьбай адстаць ад дзяўчыны.

"А той, ні слова не кажучы, дастае пісталет — гэта ўсё бачыць дзіця —  і б'е мужа нагой у жывот",  — распавядае Вікторыя.

Паводле яе слоў, першая думка была, што гэта нейкія бандыты: яны не прадставіліся, былі апранутыя ў спартыўныя касцюмы, "крычаць, каб мы каціліся адтуль. Куды? Мы тут жывем! Першая думка — паклікаць на дапамогу", распавядае жанчына.

Яны сталі клікаць на дапамогу. Але на крык прыбеглі такія ж людзі ў спартыўных касцюмах і пачалі біць яе мужа. Мужчыну забралі. Пазней яго прозвішча з'явілася ў спісах затрыманых, якія склалі валанцёры. А яшчэ пазней стала вядома, што Віктар Мароз у бальніцы — яго шпіталізавалі ў БХМД, паведаміў телеграм-канал "Белыя халаты". Дапамога медыкаў спатрэбілася ўчора яшчэ двум затрыманым у мінскіх дварах, яны ў 5-й ГКБ.

Затрыманні ў дварах учора ўвечары былі і ў іншых мікрараёнах. Усяго ў спісе затрыманых каля двух дзясяткаў прозвішчаў.

Напярэдадні Аляксандр Лукашэнка падчас размовы з супрацоўнікамі прадпрыемства "Гарызонт" заявіў, што не хоча, каб "нават у нядзелю яны хадзілі па вуліцах і перашкаджалі жыць іншым", і што "пара гэта заканчваць".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.