Порна на вуліцы Багдада і іржавыя расійскія танкі ў цэнтры Кіева — #ІхНоравы

Каб жыхары Ірака не глядзелі порна на вуліцы, сілавікам давялося перарэзаць кабель і затрымаць падазраванага. Тым часам у цэнтры Кіева адкрылася выстава іржавай вайсковай тэхнікі, а Луіза Гансалес выйшла ў другі тур прэзідэнцкіх выбараў у Эквадоры. Чаму не варта ехаць у Румынію без сродкаў ад насякомых і пра многае іншае чытайце ў нашай пастаяннай рубрыцы "Іх норавы".

У Румыніі людзей атакуе ліхаманка, якую пераносяць камары і кляшчы

У Румыніі пачасціліся выпадкі захворвання ліхаманкай Заходняга Ніла. Гэты небяспечны вірус пераносяць камары і кляшчы.

Па дадзеных СААЗ, 80% інфікаваных людзей не адчуваюць сімптомаў, але ў 20% развіваецца ліхаманка, якая можа прывесці да лятальнага канца.

Віруснае захворванне характарызуецца высокай тэмпературай, небяспечным запаленнем мазгавых абалонак, сістэмным пашкоджаннем слізістых абалонак, паталагічным павелічэннем лімфатычных вузлоў і час ад часу сыпам. У зоне асаблівай рызыкі — людзі, старэйшыя за 50 гадоў.

Распрацаванай вакцыны ад гэтай ліхаманкі не існуе.

У Багдадзе неспакойна

Казусная сітуацыя адбылася на ажыўленым скрыжаванні ў Багдадзе. На вялікім экране, дзе звычайна транслююць рэкламу, раптам паказалі порнафільм.

Відэа і здымкі хутка разляцеліся па сацсетках.

Падазраванага арыштавалі. Паводле звестак паліцыі сталіцы мусульманскай дзяржавы, гэта супрацоўнік фірмы, якая кіруе электроннымі білбордамі ў Багдадзе. Нібыта ў яго паўстала фінансавая спрэчка з гэтай арганізацыяй, і ён, каб адпомсціць, вывеў на экран порна замест рэкламы.

Порна транслявалася ўсяго некалькі хвілін. Потым прыехалі сілавікі і перарэзалі кабель.

Улады часова адключылі ўсе электронныя білборды ў Іраку.

Луіза Гансалес трымае лідарства ў першым туры прэзідэнцкіх выбараў у Эквадоры

Па выніках экзітпола, у першым туры выбараў прэзідэнта Эквадора з сур'ёзным адрывам лідзіруе сацыялістка Луіза Гансалес. Гэтая жанчына — пратэжэ былога прэзідэнта Рафаэля Карэа, які зараз жыве ў выгнанні.

Гансалес удзельнічае ў гонцы ад левага руху "Грамадзянская рэвалюцыя" і набірае 33% галасоў.

Разам з ёй у другі тур, які павінен прайсці 15 кастрычніка, выходзіць былы дэпутат парламента Даніэль Набоа, у якога 24% галасоў.

Нагадаем, што 9 жніўня ў сталіцы Эквадора Кіта быў застрэлены адзін з васьмі кандыдатаў у прэзідэнты. Гэта былы журналіст-даследчык, а пазней дэпутат парламента і змагар з карупцыяй Фернанда Вільявісэнсія.

Іржавыя расійскія танкі ў Кіеве

21 жніўня на Храшчаціку ў Кіеве адкрылася выстава падбітай расійскай тэхнікі. Яна праходзіць напярэдадні Дня незалежнасці Украіны.

Карэспандэнт "Бі-бі-сі" ў Кіеве Святаслаў Хаменка ўжо пабываў там і налічыў каля 20 танкаў, самаходных гаўбіц, БМП, МТЛБ, БТР і грузавых аўтамабіляў.

Дзень незалежнасці Украіна адзначае 24 жніўня.