Прапагандысты паказалі палітвязня Андрэя Кузнечыка
Андрэй Кузнечык / Кадр з відэа
Прапагандысты паказалі палітвязня Андрэя Кузнечыка. Журналіст-фрылансер знаходзіцца за кратамі з лістапада 2021 года. АНТ анансавала першую серыю праекта "Свабода слова". У ёй і пакажуць запісаную за кратамі гутарку з Кузнечыкам, у якой у яго распытвалі пра працу на Радыё Свабода.
Андрэю Кузнечыку 46 гадоў. Яго затрымалі 25 лістапада 2021 года, дома адбыўся ператрус. Пасля гэтага журналіста двойчы асудзілі, абвінаваціўшы ў "дробным хуліганстве" (кожны раз на 10 сутак). Ён не прызнаў сваю віну. Пасля ўзнікла крымінальная справа.
Радыё Свабода ў РБ было прызнанае "экстрэмісцкім фармаваннем". Але гэта адбылося пасля таго, як Кузнечыка затрымалі.
Андрэй Кузнечык быў асуджаны ў чэрвені 2022-га на 6 гадоў калоніі ўзмоцненага рэжыму. Справу разглядаў Магілёўскі абласны суд. Суддзя Ігар Шведаў прызнаў Кузнечыка вінаватым па артыкуле "Стварэнне экстрэмісцкага фармавання або ўдзел у ім" (ч. 1 арт. 361-1 КК). З турмы № 4 яго этапавалі ў наваполацкую калонію № 1.
