Бахарэвіч: Яшчэ ніколі я не пісаў настолькі біяграфічнай прозы! (ФОТА)
На прэзентацыі раману “Шабаны” пісьменнік Альгерд Бахарэвіч абверг чуткі, што ён палітуцякач, распавёў як зарабляе на жыццё і прызнаўся, чаму з’ехаў з Беларусі.
Новы раман Альгерда Бахарэвіча “Шабаны” быў прэзентаваны 22 сакавіка ў Інстытуце імя Гётэ ў Мінску.
“Тут некалькі галоўных герояў. Адзін – шабаноўскі хлопец, які вяртаецца праз усю кніжку з Зялёнага луга ў Шабаны. Ён ідзе і разважае, напявае нешта сабе пад нос, а навокал – ноч, Мінская ноч. Яшчэ адна галоўная гераіня – жанчына Сафія, у якой знік муж, і яна яго шукае… Галоўны герой гэтай кнігі – гэта Шабаны. І, безумоўна, галоўны герой гэтай кнігі – гэта я сам, Альгерд Бахарэвіч. Кніга вельмі аўтабіяграфічная. Яшчэ ніколі я не пісаў настолькі аўтабіяграфічнай прозы”, - кажа пра раман сам аўтар.
На працягу амаль дзвюх гадзінаў Альгерд Бахарэвіч чытаў урыўкі з раману пад візуальны шэраг Шабаноў – мінскіх і гамбургскіх… Пісьменнік жыве ў Гамбургу разам з жонкай і дачкой.
Новая кніга Бахарэвіча не толькі пра мінскія Шабаны. Яна таксама пра гамбургскія Шабаны, і пра іншыя Шабаны, што ёсць у свеце. Прысутныя на прэзентацыі людзі пачалі высвятляць, хто таксама з Шабаноў. Узнялося рук 10… “А з Сухарава?” І пачалася “пераклічка”.
“Галоўны сюрпрыз будзе ў тым, што я пакажу тое, чаго ніколі яшчэ не паказваў!”, - яшчэ да прэзентацыі рамана паабяцаў Бахарэвіч у інтэрв’ю “Будзьма”. Пісьменнік стрымаў слова. Гэтым вечарам ён быў надзвычай шчыры. Распавёў нават, што збіраўся скончыць жыццё… самагубствам.
Бахарэвіч: “Я не ведаю, як у вас хапае сілаў і трываласці жыць тут [звяртаецца да аўдыторыі-Еўрарадыё]. Я вельмі вас паважаю і захапляюся. Я з’ехаў не па грошы, а па свабоду. У пачатку 2007 года, калі я з’язджаў, я быў на мяжы знікнення. Я быў на мяжы самагубства. Пры гэта можна напісаць не адну кніжку… Я вырашыў, што не магу – у мяне ёсць дачка, мне трэба заставацца, я хачу пісаць, я хачу жыць на свабодзе”.
Пры гэтым пісьменнік абверг чуткі, што ён палітуцякач.
Бахарэвіч: “Адкуль гэта ўзялося? Я меў стыпендыі, але палітуцекачом я ніколі не быў. Я проста жыву ў Нямеччыне, у мяне жонка студэнтка. Я здымаю кватэру ў Гамбургу, жыву як звычайны чалавек”.
Аўтар новага раману “Шабаны” прачытаў нават свой першы твор. “Гэта былі графаманскія вершы!”, - прызнаецца ён. Але сам верш я тут цытаваць тут не буду. Няхай сведкамі шчырасці Бахарэвіча стануць толькі тыя, хто прыйшоў на прэзентацыю “Шабаноў”. Астатнія ж могуць пачытаць раман. І даведацца пра пісьменніка больш. Кнігу можна набыць у кнігарні “Галіяфы” у “Падземцы”, а таксама ў Акадэмкнізе.
