Літоўскія дэпутаты прагаласавалі "за" будаўніцтва ўласнай АЭС
Дэбаты ў літоўскім Сейме працягваліся тры гадзіны. Першае чытанне скончылася поспехам для прыхільнікаў АЭС у Вісагінасе. Фінальнае абмеркаванне ― у чацвер.
Прэм'ер-міністр Андрус Кубілюс пераконваў дэпутатаў, што свая АЭС паменшыць залежнасць Літвы ад расійскіх энергарэсурсаў: “Іншай такой магчымасці зменшыць сваю энергетычную залежнасць Літва ў будучыні можа не займець. Той, хто галасуе супраць праекта, галасуе за праекты атамных станцый у Беларусі і Калінінградзе”.
Большасць дэпутатаў у першым чытанні падтрымала праект будаўніцтва АЭС.
Праціўнікі літоўскай АЭС кажуць пра састарэласць тэхналогій і пра надзвычай вялікія выдаткі, а значыць, і вялікую рызыку для Літвы. Прыхільнікі АЭС лічаць гэтыя закіды неабгрунтаванымі і пераконваюць у эканамічнай мэтазгоднасці праекта. Чакаецца, што ў новую Вісагінскую АЭС кампанія Hitachi інвестуе 20% кошту. 20% акцый атрымае Латвія, 22% ― Эстонія, 38% ― Літва.
Нагадаем, папярэднюю атамную станцыю ў Ігналіне Літва цалкам зачыніла ў канцы 2009 г. як неадпаведную стандартам бяспекі ЕС.
Фота: радыё "Свабода".
