МВФ: Крэдыт Беларусі магчымы толькі пры рэформах
Савет дырэктараў Міжнароднага валютнага фонду разгледзеў вынікі трэцяга постпраграмнага маніторынгу Беларусі.
МВФ прыняў да ўвагі, што наша краіна зацікаўленая ў новай крэдытнай праграме. Аднак патэнцыйныя крэдыторы ставяць умовай гатовасць беларускіх уладаў да радыкальных рэформаў, перадае interfax.by.
На думку Савет дырэктараў МВФ, пасля стабілізацыі беларускай эканомікі ў першым паўгоддзі 2012 года адбылося занадта хуткае змякчэнне грашова-крэдытнай палітыкі разам з рэзкім пагаршэннем стану аплатнага балансу. У выніку ў канцы года гэта прывяло да ціску на абменны курс і інфляцыі. Да таго ж, заробкі ў Беларусі растуць хутчэй, чым прадукцыйнасць працы.
МВФ таксама канстатуе, што ў Беларусі "прыватызацыя не рухаецца наперад і застаецца ў сіле пашыраны ў 2011 годзе пералік сацыяльна значных тавараў, кошты на якія падлягаюць кантролю".
Нагадаем, што некалькі дзён таму Аляксандр Лукашэнка заявіў, што Беларусь абыдзецца без крэдытаў МВФ.
Фота — profi-forex.org
