Следчы КДБ з Мінску прыедзе на сустрэчу з праваабаронцай у Магілёў
Праваабаронцу з грамадзянскай кампаніі "Наш дом" Крысціну Шацікаву 15 сакавіка зноў выклікаюць на допыт у Магілёўскае абласное ўпраўленне КДБ.
Праводзіць допыт у рамках справы аб "масавых беспарадках" будзе следчы, які прыедзе з Мінску. Па словах Крысціны, яго цікавяць фотаздымкі, якія яна зрабіла ўвечары 19 снежня на плошчы Незалежнасці. На гэтых здымках, як сцвярджае праваабаронца, захаваныя сведкі, якія бачылі, хто выламваў дзверы і біў вокны ў Доме ўрада.
Праўда, усе гэтыя матэрыялы Шацікава ўжо даўно перадала следчым магілёўскага КДБ, ёсць яны і ў мінскай міліцыі. Таму асаблівага сэнсу "для ўсталявання ісціны" яна ў гэтым допыце не бачыць, перадае Радыё "Свабода".
