У пасажыраў метро міліцыя скануе нават баскетбольныя мячыкі

У карэспандэнта Еўрарадыё цягам дня рэчы праверылі чатыры разы – роўна столькі, колькі давялося спускацца ў метро. На пытанне, колькі часу яшчэ дагляд пасажыраў будзе праводзіцца, супрацоўнік міліцыі, які дзяжурыў у метро “плошчы Леніна” адказаў, што заўжды.

Пасля агледзеў заплечнік, і прасканаваў той металашукальнікам. Уся праверка занялі каля пяці секунд. У заплечніку былі баскетбольны мячык, дыктафон і швэдар. Найбольш супрацоўніка міліцыі зацікавіў мяч, але праверыўшы яго металашукальнікам, ён дазволіў прайсці далей.

Звычайна дыялог з міліцыянтам складаецца з кароткіх пытанняў і праверкі рэчаў. Маўляў, што ў вас у заплечніку. Пакажыце, добра праходзьце. Плюс абавязковая праверка металашукальнікам.

Правяраюць падазроных асоб і падазроныя рэчы, цвердзіць супрацоўнік праваахоўных органаў на станцыі метро “Акадэмія навук”. Нават калі мінак ідзе без торбаў, яго могуць праверыць, кажа міліцыянт, праглядаючы змесціва заплечніка. 

Каб забяспечыць спакой грамадзян, у метро плануюць паставіць новыя відэакамеры на станцыях “Плошча перамогі” і “Якуба Коласа”. Пра гэта Еўрарадыё распавядае Алег Круглоў – намеснік начальніка мінскага метрапалітэну.

Круглоў: “Метрапалітэн плануе ў гэтым годзе дзве станцыі зрабіць са сваіх сродкаў – “Якуба Коласа” і “Плошча перамогі”.

На сёння на 8 станцыях стаіць састарэлае абсталяванне 80-х гадоў, цвердзіць Алег Круглоў. Таму, магчыма, новае абсталяванне з’явіцца і на ўсіх 8 станцыях.

Дарэчы, у 2010 годзе ў мінскім Метрапалітэне праводзілася 115 вучэнняў. Частка з іх – па пошуку выбуховых прыстасаванняў, паведамілі ў транспартнай пракуратуры.

 Супрацоўніца пракуратуры:“Гэта інфармацыя за 2010 год. Аддзелам аховы грамадскага парадку і прафілактыцы і работнікамі патрульна-паставой службы МУС праведзена 115 вучэнняў. З іх па знаходжанні выбуховага прыстасавання – 42, затрымання ўмоўнага злачынцы -11, падзенне грамадзян на рэйкі – 9”.

Але 11 красавіка 2011 году ў Беларусі адбылася трагічная падзея – тэракт на станцыі “Кастрычніцкая”, які унёс жыцці 14 чалавек, пацярпелі больш за 200 чалавек. Таму транспартная пракуратура паставіла пад сумнеў эфектыўнасць гэтых вучэнняў.

“Вучэнні эфектыўныя, па вялікім рахунку. Але, калі б гэтыя вучэнні былі вельмі эфектыўнымі, магчыма, такой сітуацыі (тэракт у метро – заўв. Еўрарадыё) не было б. Тая падзея, якая адбылася 11 красавіка, напэўна, не была цалкам рэпрадукаваная дзесьці кімсьці”, – распавядае прадстаўнік транспартнай пракуратуры Віктар Мацкевіч.

Нагадаем, двум асобам высунутае абвінавачванне ў тэракце 11 красавіка ў мінскім метро. Пра гэта паведаміў 29 красавіка намеснік генпракурора і кіраўнік следчай групы Андрэй Швед. Яшчэ 4 чалавекі знаходзяцца ў статусе падазраваных.

Фота: telegraf.by