Самы дарагі касцяк дыназаўра і ўсыпленне бяздомных сабак у Турцыі — #ІхНоравы

18/07/2024 - 16:53

Міжнародныя навіны / Euroradio

Мужчына з Кітая западозрыў сваю жонку ў здрадзе і нават купіў дрон, каб цікаваць за ёй. Ён меў рацыю і ўжо падаў заяву на развод. Ну і хто пасля гэтага назаве яго сталкерам?

Пра гэта і не толькі — у нашай штодзённай падборцы міжнародных навін.

Касцяк стэгазаўра прадалі на аўкцыёне за 44 мільёны долараў

На аўкцыёне Sotheby's у Нью-Ёрку прадалі касцяк стэгазаўра па мянушцы Апекс за 44,6 млн долараў — яго парэшткі сталі самымі дарагімі з калі-небудзь прадаваных.

Прадстаўнікі Sotheby's назвалі Апекса "лепшым экземплярам стэгазаўра з калі-небудзь знойдзеных", яго ўзрост 161 млн гадоў.

Першапачаткова аўкцыённы дом ацаніў кошт лота ў 4-6 млн долараў. Фінальная цана пабіла папярэдні рэкорд аўкцыёну для закамянеласцяў дыназаўраў — дагэтуль самымі дарагімі лічылі парэшткі тыраназаўра Стэна, якія прадалі ў 2020 годзе за 31,8 млн долараў.

Парэшткі стэгазаўра знайшлі ў штаце Каларада ў 2022 годзе. Апекс дасягае 3,4 м у вышыню і 8,2 м у даўжыню — ад носа да хваста. Яго памеры на 30% большыя за памеры Сафі, якую раней лічылі самым цэласным экземплярам стэгазаўра.

Мужчына з Кітая з дапамогай дрона даведаўся, што жонка яму здраджвае

33-гадовы жыхар кітайскай гарадской акругі Шыянь па прозвішчы Цзінь і яго жонка па прозвішчы Ву жанатыя каля дзесяці гадоў. Год таму мужчына заўважыў, што жонка да яго "астыла" і стала наўмысна яго ігнараваць.

Яшчэ больш падазрэнняў у мужчыны з'явілася пасля таго, як жонка атрымала пасаду ў офісе начальніка прадпрыемства і па некалькі разоў на дзень стала "наведваць бацькоў".

Тады мужчына купіў дрон і прасачыў за жонкай. Усталяваная на дроне камера зняла, як жанчына села ў машыну і паехала ў горную мясцовасць за горадам.

Там яна гуляла за руку з мужчынам, а потым разам з ім схавалася ў напаўразбураным доме. Праз 20 хвілін яны выйшлі і паехалі на завод, дзе разам працуюць.

“Гэты мужчына — яе бос. Яго жонка таксама працуе на гэтым заводзе, ім было няёмка сустракацца ў офісе, таму ім давялося бачыцца на прыродзе", — заявіў Цзінь.

Цяпер ён мае намер прад'явіць знятыя кадры ў судзе на шлюбаразводным працэсе.

У Турцыі хочуць усыпляць бадзяжных сабак

У парламенце Турцыі пачалося абмеркаванне законапраекта, які дазваляе забіваць бяздомных сабак. З такой прапановай выступіла кіроўная партыя прэзідэнта Рэджэпа Таіпа Эрдагана, піша Euronews.

Ён заявіў, што ў краіне налічваецца каля 4 мільёнаў бяздомных жывёл, многія з іх бадзяжнічаюць зграямі, ёсць нямала выпадкаў нападу на людзей.

Законапраект абавязвае муніцыпалітэты адлоўліваць бадзяжных сабак і змяшчаць іх у прытулкі для стэрылізацыі. Хворыя на шаленства і агрэсіўныя жывёлы будуць падлягаць эўтаназіі.

Зааабаронцы сцвярджаюць, што мясцовыя ўлады дзеля эканоміі сродкаў будуць масава знішчаць жывёл.

Актывісты пратэстуюць каля будынка парламента ўжо другі дзень запар, патрабуючы адклікаць законапраект. Супраць ініцыятывы выступае і турэцкая апазіцыя.

У Вялікабрытаніі ўхвалілі продаж штучнага мяса

Кампанія Meatly плануе пачаць продаж штучнай курыцы ўжо сёлета. Мяса будзе выкарыстоўвацца ў кармах для жывёл. Яна атрымала адпаведныя дазволы ад брытанскага Агенцтва па ахове здароўя жывёл і раслін.

Мяса атрымліваюць з жывёльных клетак, якія вырошчваюцца ў спецыяльных біярэактарах. У свеце ўжо ёсць краіны, дзе чалавек можа есці падобнае мяса — Ізраіль, Сінгапур і большасць амерыканскіх штатаў.

Праціўнікі тэхналогіі лічаць, што яна ставіць пад пагрозу традыцыйную жывёлагадоўлю.

У ААН лічаць, што культываванае мяса і альтэрнатыўнае малако могуць дапамагчы скараціць шкодныя для клімату выкіды. На жывёлагадоўлю прыпадае каля 20% выкідаў, якія спрыяюць глабальнаму пацяпленню.