Сёлета Дзень Волі ў Мінску зноў адзначаць на плошчы Бангалор
Шэсце запланаванае на 25 сакавіка ад кінатэатра “Кастрычнік” да парку Дружбы народаў з мітынгам у фінале.
26 лютага адбылося першае пасяджэнне аргкамітэту па святкаванні Дня Волі. Было вырашана правесці 25 сакавіка дэманстрацыю па ўжо традыцыйным сцэнары: збор каля кінатэатра “Кастрычнік”, шэсце да плошчы Бангалор і мітынг у парку Дружбы народаў.
Пра гэта Еўрарадыё распавёў лідар Партыі БНФ Аляксей Янукевіч:
Янукевіч: “Асноўным лозунгам акцыі сёлета стане “Разам за мір і незалежнасць”. Натуральна, у якасці асноўнай будзе прысутнічаць і тэма святкавання, і тэма адстойвання беларускай незалежнасці. Будзе прысутнічаць тэма салідарнасці з Украінай і, шырэй, салідарнасці з усімі народамі, якім сёння пагражае крамлёўскі імперыялізм. А на самой плошчы Бангалор будзем запрашаць выступаць не толькі палітыкаў, але і творчых асобаў, музыкаў і г.д., якія пагодзяцца”.
Што праўда, Янукевіч не верыць у магчымасць паставіць гукаўзмацняльную апаратуру падчас мітынгу. Гэтае пытанне арганізатары будуць вырашаць, але спадзявацца на большае, чым мегафон, не даводзіца.
Наступнае пасяджэнне аргкамітэту, у які ўваходзяць партыя БНФ, “Рух “За свабоду”, “БХД”, “АГП”, “Альтэрнатыва”, “Моладзь “Руху “За свабоду”, “Маладыя хрысціянскія дэмакраты”, прызначана на аўторак, 3 сакавіка.
