У Баранавічах мужчына спаліў у пад'ездзе дома мядзведзя

У Баранавічах мужчына спаліў у пад'ездзе шматкватэрнага дома плюшавага мядзведзя, спалохаўся і скокнуў з акна. Цяпер яму пагражае крымінальная адказнасць за хуліганства.

Як піша брэсцкая міліцыя, падпаліць мядзведзя ў пад'ездзе 36-гадовага жыхара Баранавічаў падштурхнуў канфлікт з сужыцелькай. Ён вярнуўся дадому ноччу п'яны, што не спадабалася жанчыне. Мужчына чамусьці вырашыў знішчыць плюшавага мядзведзя, які належаў яму. Але, калі пачаўся пажар, спалохаўся наступстваў, таму і выйшаў праз акно сваёй кватэры на першым паверсе.

Мужчыну знайшлі міліцыянты. Патлумачыць, што гэта быў за перфоманс, ён не змог. Распачатая крымінальная справа.

Узгаранне ў пад'ездзе часткова ліквідавалі мясцовыя жыхары, а закончылі працу ратавальнікі. Камунальнікі ацанілі шкоду на 140 рублёў.