У Гомелі распачалі крымінальную справу за пашкоджаную кнігу скаргаў

У Гомелі распачалі крымінальную справу за пашкоджаную кнігу скаргаў. Здарэнне адбылося ў рэстаране самаабслугоўвання. Як піша @uvdgomel, двое мужчын замовілі ежу і алкаголь, расплаціліся на касе. Пазней яны запатрабавалі, каб афіцыянтка прынесла сурвэткі. Дзяўчына адказала, што гэта трэба зрабіць самастойна. Адказ кліентам не спадабаўся і яны запатрабавалі кнігу скаргаў і прапаноў.

Адзін з кліентаў змог выкласці сутнасць сваіх прэтэнзій, у іншага, 28-гадовага жыхара Добрушскага раёна, які быў у стане алкагольнага ап'янення, гэта не атрымалася. І ён вырваў з кнігі аркуш. У рэстаран выклікалі міліцыю. Крымінальную справу распачалі за пашкоджанне афіцыйнага дакумента.