У Гомелі судзяць апошняга лідара "банды Марозава" — ён кіраваў кілерамі
Сяргей Дзербянёў / фота МУС Беларусі
У Гомелі пачаўся судовы працэс над Сяргеем Дзербянёвым, апошнім лідарам "банды Марозава", паведамляе АНТ.
Па справе 53-гадовага Дзербянёва, які быў адказны за фізічную ліквідацыю канкурэнтаў і ўзначальваў групу кілераў у бандзе, налічваецца 50 тамоў і 8 даказаных ахвяр.
Дзербянёў больш за 15 гадоў хаваўся ад следства. Увесь гэты час ён знаходзіўся ў міжнародным вышуку. У 2020 годзе яго экстрадавалі з Расіі ў Беларусь. У расійскім Уладзівастоку Дзербянёў працаваў ахоўнікам на адным з прадпрыемстваў. Падчас затрымання прад'явіў пашпарт грамадзяніна РФ на чужое імя.
"Банда Марозава" існавала з канца 1980-х па 2004 год. Злачынцы займаліся забойствамі і рабаваннямі у Гомелі і Гомельскай вобласці.
"Марозаўцаў" асудзілі ў снежні 2006 года. Следства даказала больш за 100 злачынстваў, якія здзейсніла банда, у тым ліку каля 20 забойстваў.
Кіраўнікоў банды Сяргея Марозава, Валерыя Гарбатага і Ігара Данчанку, прысудзілі да вышэйшай меры пакарання. Астатнія злачынцы атрымалі да 20 гадоў пазбаўлення волі.
