З палону вызвалілі памежніка — сапраўднага аўтара фразы пра расейскі карабель
Украіна змагла вызваліць з расійскага палону памежніка з вострава Змяіны, які паслаў расійскі ваенны карабель. Пра гэта паведамляе hromadske.ua са словаў прэс-сакратара Дзяржаўнай памежнай службы Андрэя Дземчанкі.
Раней аўтарства легендарнай фразы прыпісвалася марскому пехацінцу Раману Грыбаву. Яго ўдалося вызваліць з палону яшчэ напрыканцы сакавіка. Насамрэч аўтарам фразы быў не ён, а адзін з памежнікаў. Па словах Дземчанкі, гэта была аперацыя па інфармацыйным прыкрыцці ўсіх палонных абаронцаў Змяінага.
Цяпер Памежная служба Украіны пацвярджае, што словы пра рускі ваенны карабель сказаў памежнік, якога ўжо вызвалілі з палону. Імя сапраўднага аўтара фразы трымаюць у сакрэце з меркаванняў бяспекі.
Прэс-сакратар памежнікаў адзначае, што падчас расійскай атакі на Змяіны канал сувязі мелі толькі памежнікі. Таму расійскія караблі маглі кантактаваць толькі праз іх.
Таксама Дземчанка расказаў, як з'явіўся аўдыязапіс. Яго запісвалі іншыя ўкраінскія вайскоўцы на мацерыковай частцы Украіны, дзе ёсць такая ж радыёкропка. Яны і зафіксавалі знакамітыя словы.
Фраза пра рускі ваенны карабель стала легендарнай. Ва Украіне выходзіць ужо другая паштовая марка, прысвечаная ёй. У некаторых еўрапейскіх краінах гэтую фразу ці яе варыяцыі размяшчалі на білбордах.
