З-за COVID-19 у Маларыце адмянілі большасць мерапрыемстваў Дня горада

З-за сітуацыі з COVID-19 у Маларыце (Брэсцкая вобласць) адмянілі большасць мерапрыемстваў Дня горада. Як паведамляе раённая газета "Голас часу", такое рашэнне 29 верасня прыняло мясцовае кіраўніцтва. Свята запланаванае на 2 кастрычніка. Усе масавыя мерапрыемствы мусілі прайсці на свежым паветры. Чыноўнікі ж улічылі даныя пра пагаршэнне сітуацыі з захворваннямі COVID-19, адзначае выданне. У выніку ў суботу адбудуцца толькі марафон, сельскагаспадарчы кірмаш, футбольны матч і адкрыццё футбольнай міні-пляцоўкі са штучным пакрыццём.

Жыхароў Маларыты заклікаюць выконваць меры прафілактыкі распаўсюду каранавіруснай інфекцыі — найперш насіць ахоўныя маскі ў грамадскіх месцах, дзе знаходзіцца шмат людзей.

Статыстыку па COVID-19 па раёнах ці хаця б па абласцях у Беларусі не публікуюць. Па афіцыйных даных Мінаховы здароўя, штодня рэгіструецца каля 2 тысяч новых выпадкаў захворвання.