Як інфамавала Еўрарадыё, 8 лютага сталічная міліцыя паведаміла жахлівую навіну: у Мінску каля дома па праспекце Ракасоўскага знайшлі труп дзіцяці з пятлёй на шыі. Расследаваннем крымінальнай справы занялося Галоўнае следчае ўпраўленне Следчага камітэта. Па падазрэнні ў злачынстве затрымалі пяць чалавек, у тым ліку маці і бацьку дзіцяці. Яны разам выпівалі ў кватэры, дзе жыў хлопчык з бацькамі, бабуляй і яе сужыцелем. Былі прызначаны шматлікія экспертызы. Неўзабаве з пяці чалавек трох, у тым ліку і маці дзіцяці, адпусцілі. Пад вартай заставаліся бацька і сужыцель бабулі.
Следства высветліла, што ў тую ноч у кватэры была п’янка. У госці прыйшлі двое знаёмых гэтай сям’і. Бацька неаднаразова браў дзіця на рукі, але з-за таго, што быў моцна п’яны, падаў разам з ім на падлогу. У выніку дзіця атрымлівала шматлікія траўмы.
Фігуранты справы сцвярджаюць, што не памятаюць усіх падзей той ночы. Яны спасылаюцца на моцнае алкагольнае ап’яненне. Следства правяло вялікі аб’ём працы, вывучаліся запісы камер відэаназірання, апытваліся сведкі, вывучаліся мабільныя тэлефоны затрыманых.
Экспертыза засведчыла, што прычынай смерці дзіцяці сталі траўмы рознай ступені цяжкасці. У дачыненні апошніх двух затрыманых правялі комплексныя псіхолага-псіхіятрычныя экспертызы, якія засведчылі, што мужчыны ўсведамлялі небяспечны характар сваіх дзеянняў.
Бацьку дзіцяці абвінавачанне выставілі па артыкулах “прычыненне смерці па неасцярожнасці” і “пакіданне ў небяспецы”. Сваю віну мужчына прызнаў. Ён па-ранейшаму знаходзіцца пад вартай. Сужыцель бабулі знаходзіцца пад абавязацельствам аб яўцы. Дадатковая экспертыза мусіць даць адказ на пытанне, ці не спрабуе ён сімуляваць амнезію.