Ад санкцый ЕС выручка кампаніі Анатоля Тарнаўскага зменшылася ў 8 разоў

Група кампаній "Юнівес-М" — бізнэс беларуска-­расійскага мільянера Анатоля Тарнаўскага, які ў 2012 годзе пацярпеў ад санкцый Еўрасаюза. У чорны спіс тады трапілі "Юнівест­М", "Юніс Ойл" і "Юнівест-БудІнвест".

Тарнаўскі быў адным з найбуйнейшых нафтатрэйдараў, але апошнім часам сканцэнтраваўся на будаўніцтве. Яго бізнэс квітнее пры шчыльным супрацоўніцтве з Прэзідэнцкім спартыўным клубам, які ўзначальвае Дзмітрый Лукашэнка. Намесніцай па маркетынгу гендырэктара "Юнівест­М" працавала жонка Дзмітрыя, Ганна Лукашэнка.

Паводле бухгалтарскага баланса кампаніі, выручка "Юнівест-М" за 2012 год складала 226 мільёнаў долараў. А ў 2013 годзе яна зменшылася да 27 мільёнаў, піша nn.by. Сукупны чысты прыбытак таксама паменшаў, хоць і не так моцна — з 5,9 мільёна долараў да 5 мільёнаў.

Фота — nn.by