Адзінай дзяржаўнай Чарнобыльскай праграмы ў Беларусі больш не будзе

За час існавання незалежнай Беларусі на ліквідацыю наступстваў Чарнобыльскай катастрофы было вылучана каля 60 мільярдаў рублёў — прыкладна 20 мільярдаў долараў у сённяшнім эквіваленце. Такую лічбу назваў міністр па надзвычайных сітуацыях Вадзім Сіняўскі ў інтэрв'ю часопісу "Экономика Беларуси".

Сродкі выдаткоўваліся ў межах шасці дзяржаўных праграмаў. У пацярпелых раёнах пабудавалі больш за 69 тысяч кватэраў і дамоў, газіфікавалі 25 тысяч з іх, праклалі больш за 4 тыс. кіламетраў газавых і да 2,5 тыс. кіламетраў водаправодных сетак. Былі пабудаваныя і адрамантаваныя больш за 160 бальніц і паліклінік, каля 280 школаў і дзіцячых садкоў, звыш 300 сельгасаб'ектаў. У 12 дзіцячых рэабілітацыйна-аздараўленчых цэнтрах штогод бясплатна праходзяць аздараўленне каля 85 тысяч дзяцей з забруджаных рэгіёнаў.

Шостая дзяржпраграма пераадолення наступстваў катастрофы завяршылася ў 2025 годзе. А новую агульную праграму ўлады вырашылі не ствараць.

"Раней у адной дзяржпраграме прадугледжваліся захады сацыяльна-эканамічнага развіцця тэрыторыяў, павышэння эфектыўнасці сельскай, лясной гаспадаркі, аховы здароўя, адукацыі і гэтак далей. У цяперашняй пяцігодцы кірункі развіцця пацярпелых ад аварыі на ЧАЭС тэрыторыяў уключаныя асобнымі блокамі ў адпаведныя дзяржпраграмы", — расказаў Вадзім Сіняўскі.

МНС будзе займацца праграмай "Інфраструктура бяспекі насельніцтва" на 2026–2030 гады. Паводле Сіняўскага, гэтая праграма працягвае палітыку, заснаваную на прынцыпе "ад ліквідацыі наступстваў да рэабілітацыі і развіцця".

Ён заявіў, што ў выніку скасавання адзінай Чарнобыльскай дзяржпраграмы фінансаванне праграм сельскай гаспадаркі, аховы здароўя і сацыяльнай абароны нават вырасла. МНС, паводле міністра, будзе кантраляваць выкананне ўсіх захадаў, радыяцыйны кантроль і весці маніторынг прадукцыі.