“Без Білета” знялі кліп на свой першы хіт "Мая краiна Беларусь" (відэа)
Мінскі гурт "Без Білета" прэзентуе новы кліп на песню "Мая краiна Беларусь", дзякуючы якой музыкі атрымалі папулярнасць на пачатку 2000-х.
“Пра кліп на гэтую песню мы перыядычна думалі апошнія дзесяць гадоў, — прызнаецца лідар гурта Віталь Артыст. — Прыхільнікі ўвесь час пыталіся, калі будзе кліп, і самі мы хацелі гэта зрабіць, бо адчувалі, што абавязаныя гэтай песні, а кліпа ў яе няма, яна сіратлівая. Таму аднавілі аранжыроўку, зрабілі яе, як нам падаецца, адпаведнай XXI стагоддзю. Ды добра ўклаліся, каб візуалізаваць сваю фантазію”.
У аснову сюжэта кліпа лягла даўняя аўтарская ідэя Віталя Артыста пра свет дзікіх плямёнаў, якія маглі б з'явіцца на беларускай зямлі пасля нашай цывілізацыі. Яны маглі б валодаць нейкімі звышздольнасцямі, аднак шанаваць усе тыя ж жыццёва важныя элементы: агонь, паветра, ваду, зямлю і, вядома, каханне. Здымкі праходзілі ў маляўнічых і экзатычных месцах Беларусі.
“Усе кадры былі знятыя ў Беларусі, усе горы, якія з’яўляюцца ў кліпе, знаходзяцца на тэрыторыі нашай краіны, — тлумачыць даволі незвычайны для Беларусі ландшафт у кліпе Віталь. — Паколькі гэта фэнтэзі, то такое наша бачанне: Беларусь можа быць не толькі плоскай, а і ландшафтнай, гарыстай і можа нават мора з’явіцца. І гэта вельмі добра адбіваецца на тэмпераменце нацыі. Бо, на наш погляд, чым багацейшы ландшафт, тым людзі больш энергічныя”.
Завяршаецца кліп масленічнай народнай песняй, што таксама крыху не адпавядае карцінцы. Але і на гэта ў Віталя ёсць сваё тлумачэнне:
“Масленіца — гэта перш за ўсё адраджэнне. То бок прыходзіць лета, нараджаецца жыццё… Гэты кліп, мне падаецца, у пэўнай ступені можа пакласці пачатак духоўнаму адраджэнню маладой Беларусі”.
Самі музыкі называюць відэа альтэрнатыўнай візітнай карткай Беларусі — “з гарамі, але без трактароў ды вышыванак”.
Спампаваць новую версію песні “Мая краіна Беларусь” і яе караоке-версію на (у песні паўтараюцца тры словы) можна тут.
