Брэсцкі суд адмовіўся прыпыняць будаўніцтва акумулятарнага завода
Брэсцкі абласны суд 12 сакавіка не задаволіў скаргу эколагаў, якія прасілі спыніць будаўніцтва акумулятарнага завода падчас разгляду справы, перадае тэлеканал "Белсат".
Напрыканцы студзеня грамадская арганізацыя "Экадом" і некалькі прыватных асобаў звярнуліся ў суд Маскоўскага раёну Брэста. Яны прасілі прыпыніць гаспадарчую дзейнасць кампаніі "АйПаўэр" з 12 па 21 сакавіка.
У адказ завод папрасіў суд, каб заяўнікі гарантавалі страты, якія можа панесці адказчык ад такога спынення — 861 754,64 рубля. Гэтую суму было прапанавана ўнесці на дэпазітны рахунак суда.
У выніку абласны суд прыняў рашэнне не на карысць праціўнікаў будаўніцтва заводу.
Асноўны разгляд справы аб спыненні будаўніцтва заводу адбудзецца 21 сакавіка.
