Brutto: Выступу на "Мінск-Арэне" не будзе, "Дынама" перадумала
Новы гурт Сяргея Міхалка мусіў з'явіцца там 29 лістапада перад пачаткам хакейнага матча.
Brutto не выступіць на "Мінск-Арэне". Пра гэта ў Facebook напісаў лідар гурта Сяргей Міхалок.
Нагадаем, раніцай 21 лістапада навіна пра "першае выступленне ў Беларусі гурта Brutto" з'явілася на сайце хакейнага клуба "Дынама-Мінск". Паведамлялася, што новы праект Сяргея Міхалка "стане галоўным элементам перадматчавага шоў" перад пачаткам хакейнага матча чэмпіянату КХЛ паміж мінскім "Дынама" і заграбскім "Медвешчаком" на "Мінск-Арэне". Пазней гэтая навіна з сайта знікла.
"Выступлення BRUTTO на "Мінск-Арене" не будзе. У ХК "Дынама" перадумалі (афіцыйнае паведамленне пра гэта клуб збіраецца апублікаваць сёння пасля абеду)", — піша Brutto на сваёй старонцы ў Facebook.
Сітуацыю пракаментаваў Сяргей Міхалок: "Мы вельмі хацелі, каб у YouTube з'явіліся дзясяткі відосаў, як Міхалок з братвой спявае "Наша возьме" ў "Мінск-Арэне". Нумар амаль прайшоў. Будзем спрабаваць патрапіць на Дажынкі".
