Чаму імпарт з Казахстана паніжаецца, нягледзячы на Мытны саюз?

У 2012 годзе аб'ём гандлю Беларусі з Казахстанам вырас на 14,5%, — такія вынікі прагучалі на сустрэчы кіраўнікоў дзвюх краін у Астане. Праўда, у 2013 годзе таваразварот знізіўся.

 

Аб'ём імпарту з Казахстана ў першым квартале 2013 года на 44% меншы, чым за той жа перыяд 2012 года. Экспарт ніжэйшы амаль на 17%.

 

"Думаю, што гэта першы квартал такі цяжкі атрымаўся. Пагаршэнне кан'юнктуры ў Расіі, галоўным рынку Беларусі і Казахстана", — кажа эканамічны аналітык Сяргей Чалы.

 

Але, калі параўнаць імпарт тавараў у Беларусь з Казахстана, пачынаючы з 2010 года, то ён таксама пастаянна змяншаўся. І гэта нягледзячы на ўступленне ў Мытны саюз.

 

2010 год, імпарт — 405,8 мільёна долараў, 2011 год — 137 мільёнаў долараў, 2012 год — 118 мільёнаў. Пры гэтым экспарт беларускіх тавараў у Казахстан павялічваўся — 674 мільёны ў 2011 годзе і 805,9 мільёна долараў у 2012. Таму ў сярэднім таваразварот вырас.

 

"У нас 2012 год была свядомая палітыка скарачэння імпарта. Я думаю, што гэта яшчэ і вынік дэвальвацыі, бо па коштавых параметрах імпарт стаў даражэйшы", — кажа Сяргей Чалы.

 

А наш экспарт пасля дэвальвацыі патаннеў, таму і падрос, — пацвярджае гэтую версію аналітык афіцыйнага партнёра Альпары ў Астане Раман Абаленскі.

 

 

"Казахстан ніколі не быў для нас краінай актыўнага эканамічнага абарачэння. Мы туды маглі прадаваць малако і цукар, а закупляць металапракат, вырабы з металу і шыны. Зараз наменклатура мяняецца. На сённяшні дзень структура імпарту з Казахстана цалкам замяняльная, калі глядзець на бліжэйшае замежжа і кошты", — кажа эканаміст Леанід Заіка.

 

Таму трагедыі эксперт у зніжэнні не бачыць. Бо імпарт з Казахстана і так быў невялікі.

 

Павелічэнне ж імпарта з Казахстана ў 2010 годзе звязанае са зніжэннем паставак расійскіх нафтапрадуктаў. Беларусь замяніла іх на казахскія. Але ў 2011 годзе падпісала дамовы з Венесуэлай і Азербайджанам. Таксама, адзначае Раман Абаленскі, на зніжэнне паставак тавараў з Казахстана ў Беларусь паўплывала агульнае скарачэнне здабычы нафты ў Казахстане.

 

Імпарт з Расіі таксама знізіўся ў першым квартале 2013 года на 9,1%. Гэта ізноў можна спісаць на няўдалы пачатак года.

 

"Галоўны эфект Мытнага саюза, што ў нас павялічылася адмоўнае сальда з Расіяй. Таму што пачалі больш і лепш атрымоўваць энергетычных тавараў, а экспартам гэта не кампенсавалі. Затое палепшылі сальда з іншымі краінамі, якія не ўваходзяць у Мытны саюз", — кажа Сяргей Чалы.

 

Адмоўнае сальда з Расіяй па выніках 2012 года вырасла на 835,6 мільёна долараў.

 

 

Фота: centralasiaonline.com