Да Новага года Мінск упрыгожаць новымі светлавымі кампазіцыямі

Святочную ілюмінацыю ў Мінску ўключаць 15 снежня, паведамляе агенцтва "Мінск-Навіны" са спасылкай на прадпрыемства "Мінгарсвятло". У горадзе ўжо ўсталявалі 12 ёлак, цяпер рыхтуюць светлавыя кампазіцыі — у тым ліку вялізныя шары, якія традыцыйна ўпрыгожваюць Кастрычніцкую плошчу.

Па ўсім горадзе такіх шароў будзе ўстаноўлена каля 30. Прычым 12 з іх "запаляць" чамусьці на плошчы Дзяржаўнага сцяга.

На Кастрычніцкай плошчы таксама размесцяць светлавога каня з карэтай, ля Палаца спорту — арку, ля Палаца дзяцей і моладзі — светлавыя кампазіцыі ў выглядзе фантанаў, снегавіка, аленя і зайца. Але гэтыя "яркія" кампазіцыі можна было бачыць і раней.

Будуць і навінкі. Адна са свежых светлавых кампазіцый — "Лебедзі" — упрыгожыць скрыжаванне праспекта Пераможцаў і вуліцы Ратамскай. Ля "Мінск-Арэны" ўсталююць "канькі". Акрамя таго, на вуліцах з'явяцца светлавыя фігуры жывёл з усходняга календара.