Што азначае звальненне галоўнага ідэолага з Адміністрацыі прэзідэнта?
Пра тое, што Ігар Бузоўскі вызвалены ад пасады намесніка кіраўніка Адміністрацыі прэзідэнта Беларусі, стала вядома вечарам 21 снежня. "У сувязі з пераходам на іншую працу", ― коратка праінфармавала прэс-служба Лукашэнкі. У той жа дзень кіраўнік краіны выказаўся пра неабходнасць абнаўлення сваёй Адміністрацыі. Ён прапанаваў скараціць пасаду намесніка па ідэалогіі, чые абавязкі цяпер будуць выконваць першы намеснік кіраўніка Адміністрацыі прэзідэнта Максім Рыжанкоў і прэс-сакратар прэзідэнта Наталля Эйсмант.
На просьбу Еўрарадыё ліквідацыю пасады намесніка па ідэалогіі ў Адміністрацыі кіраўніка краіны каментуюць медыяаналітык і палітаглядальнік Аляксандр Класкоўскі, а таксама палітолаг і юрыст Юрый Чавусаў. Падаем іх меркаванні.
Відавочна, што зусім бракуе ў дзяржаве грошай. І даводзіцца аптымізаваць нават Адміністрацыю прэзідэнта. У гэтых умовах Аляксандр Лукашэнка прыкінуў, якой адзінкай можна ахвяраваць і скарачае адзінку найменей значную з яго гледзішча. Хаця перад гэтым чарговы раз паўтараў выказванні аб важнасці ідэалагічнай працы. Але там не змог сфармуляваць, што такое гэтая ідэалагічная праца
Аляксандр Класкоўскі
"Па-першае, відавочна, што зусім бракуе ў дзяржаве грошай. І даводзіцца аптымізаваць нават Адміністрацыю прэзідэнта. У гэтых умовах Аляксандр Лукашэнка прыкінуў, якой адзінкай можна ахвяраваць і скарачае адзінку найменей значную з яго гледзішча. Хаця перад гэтым чарговы раз паўтараў выказванні аб важнасці ідэалагічнай працы. Але там не змог сфармуляваць, што такое гэтая ідэалагічная праца. Там і спорт, і культура, усяго патроху. І фактычна ўсе гэтыя гады, пачынаючы з вясны 2003 года, калі Лукашэнка выступіў з праграмным дакументам аб ідэалогіі, калі пачала стварацца ўся сістэма ідэалагічнай вертыкалі, так ніхто і не зразумеў, што гэта за звер такі ― беларуская дзяржаўная ідэалогія... Праца ўсёй гэтай сістэмы звялася да таго, што трэба пільнаваць лаяльнасць у дзяржаве. І сёння ідэолагам няма што людзям сказаць, бо ў іх за душой нічога няма. У святле прапагандысцкай машыны "рускага свету" бачна, што наш ідэалагічны апарат абсалютна бяссільны. Не ведае як і не ўмее процідзейнічаць яму. Толькі арыштаваць аўтараў "Рэгнума". І Лукашэнка разумее, што амбіцыйная задача стварыць асобную ідэалогію беларускай дзяржавы пацярпела паражэнне".
Гэта не першае скарачэнне Адміністрацыі. Цягам апошніх гадоў колькасць чыноўнікаў Адміністрацыі скарачаецца, вага міністэрстваў і ураду павялічваецца. Я думаю, ідэалогія застанецца, проста кіраваць ёй будуць трошкі па-іншаму. Тут трэба разумець, што Адміністрацыя ― гэта крыху штучны праект. Гэта не урад, дзе ёсць пералік абавязкаў і пасадаў. Адміністрацыя заўжды будуецца пад пэўнага кіраўніка, пад асобаў, якія туды патрапляюць
Юрый Чавусаў
"Не думаю, што гэта палітычнае рашэнне аб адмове ад ідэалогіі. Тым больш, што ідэалагічная вертыкаль усё ж застаецца. Мяркую, прапагандысцкая накачка застанецца. А прычына звальнення Бузоўскага ― у патрэбе аптымізацыі структуры Адміністрацыі. Тыя функцыі, якія выконваў Бузоўскі, застануцца. Гэта не першае скарачэнне Адміністрацыі. Цягам апошніх гадоў колькасць чыноўнікаў Адміністрацыі скарачаецца, вага міністэрстваў і ураду павялічваецца. Я думаю, ідэалогія застанецца, проста кіраваць ёй будуць трошкі па-іншаму. Тут трэба разумець, што Адміністрацыя ― гэта крыху штучны праект. Гэта не урад, дзе ёсць пералік абавязкаў і пасадаў. Адміністрацыя заўжды будуецца пад пэўнага кіраўніка, пад асобаў, якія туды патрапляюць. І не пералік працоўных функцыяў вызначае, каго прызначыць на пасаду. А персаналіі вызначаюць, як будуць размяркоўвацца іх абавязкі. Напрыклад, менавіта Пяткевіч, Шэйман у свой час вызначалі, чым яны будуць займацца, свае абавязкі".
Дзе будзе працаваць Ігар Бузоўскі, пакуль не вядома. Яму 44 гады. Намеснікам кіраўніка Адміністрацыі працаваў са снежня 2014-га. Да таго часу чатыры гады ўзначальваў ЦК БРСМ.
