"First SkyFloor" паказалі мінчукам "нябесны" джаз

Яшчэ адно імя ў афішы міжнароднага праекту "Джазавы мост": у Мінску выступіў гурт з Кёльну "First SkyFloor" у тандэме з адзіным джазавым арганістам Беларусі Канстанцінам Гарачым.

У такім складзе музыканты выступілі ўпершыню.

На імпрэзе былі прадстаўлены толькі аўтарскія творы музыкантаў гурта.  У новую канцэртную праграму  "First SkyFloor" пагружалі гледачоў няспешна і слушна, нібыта завабліваючы ў пругкае сеціва свайго эмацыйнага і разнастайнага джазу. І толькі бліжэй да сярэдзіны праграмы, адчуваючы настрой, натхненне і кураж гледачоў, пачалі граць больш смела і ўзнёсла.

Цімафей Бірукоў (бубны, вібрафон)

Цімафей Бірукоў прадстаўляў кожную кампазіцыю канцэрта, перакладаў назвы твораў з нямецкай мовы, распавядаў цікавыя гісторыі з жыцця гурта і шмат жартаваў. 

Канстанцін Гарачы (Hammond Organ)

Падчас некаторых асабліва паспяховых сола кожнага з музыкантаў, зала зрывалася на доўгія апладысменты. І падавалася, што калі гэтае сола працягнецца яшчэ хоць колькі секунд, над штодзённай мітуснёй, у прыгожых джазавых гармоніях уздымуцца нават крэслы ў зале. А самі гледачы, як і абяцалі музыканты, у сваіх эмоцыях апынуцца на першым паверсе нябёсаў і ужо адтуль будуць назіраць за шматкаляровымі ландшафтамі гуку.

Віталь Золатаў (гітара), Аляксей Малахаў (саксафон)

Некаторыя сола – напрыклад, "пераклічка" Косці Гарачага на Hammond Organ  і Аляксея Малахава на ценар-саксафоне часам нагадвалі не проста дэманстрацыю магчымасцяў музычных інструментаў і таленту саміх музыкантаў, а эмацыйны дыялог закаханых мужчыны і жанчыны.

Праграма выступу складалася з матэрыялу 2-х запісаных музыкантамі дыскаў, а таксама новага матэрыялу. Так, хуткая і загадкавая, падобная да шаманскай казкі, мелодыя "Гарадскія пастухі" (аўт.Віталь Золатаў) змянялася летуценнай "Легендай" Цімафея Бірукова. "Кіпучая" прыстойная імправізацыя п’есы "Цягамоціна" атмасфернай і крыху трагічнай "Ла вэрітэ", тэмпераментная "Get in!!" павольнай і палкай "Начны цягнік ".

"Як і ў жыцці, — кажуць музыканты. — Часам ты адчуваеш сябе аптымістычным і бадзёрым, а часам табе трэба адпачыць, расслабіцца, падумаць пра што-небудзь прыемнае і атрымаць станоўчыя эмоцыі".

Лёгкасць, празрыстасць, свежасць і пластычнасць музычнага тэксту шчодра ўзнагароджваліся радасцю ўспрымання музыкі "First SkyFloor" гледачамі. Няспешнае, рытмічнае развіццё мелодый дазваляла музыцы быць ледзь адчувальнай.

"First SkyFloor" —  яшчэ адзін доказ таго, што джаз — гэта не салонная, пампезная музыка, хоць гэтае меркаванне зараз вельмі распаўсюджанае ў пэўных колах. Серыя канцэртаў, якую правялі ў Мінску музыканты "First SkyFloor" сумесна с Канстанцінам Гарачым, знішчыла дыстанцыю паміж гледачамі і музыкантамі: імпрэзы праходзілі без пафасу, але ўзамен яны сталі больш блізкімі, і ад гэтага больш шчырымі, сапраўднымі і арганічнымі.

Самі музыканты засталіся задаволеныя мінскімі канцэртамі і  ўпэўнены — гэтыя "кёльнска-мінскія сустрэчы" у нашай сталіцы далёка не апошнія. Бо ў наведвальнікаў мінскіх джазавых імпрэзаў добры густ, а сярод таго, што мы пачулі ў музыцы "First SkyFloor", безумоўна, кожны змог зразумець і знайсці нешта для сябе.