Ізраільскі дыпламат у ААН прымацаваў да пінжака жоўтую зорку

Пастаянны прадстаўнік Ізраіля пры ААН Гілад Эрдан падчас пасяджэння Савета Бяспекі ААН па Блізкім Усходзе прымацаваў да свайго пінжака жоўтую зорку і паабяцаў не здымаць яе датуль, пакуль Савет Бяспекі не асудзіць дзеянні руху ХАМАС.

"Некаторыя сябры СБ ААН так нічому і не навучыліся за мінулыя 80 гадоў, некаторыя з вас забыліся, чаму з'явілася гэтая арганізацыя", — сказаў пры гэтым Гілад Эрдан. Калі здарыўся Асвенцым, свет маўчаў. Свет, паводле яго слоў, зноў маўчыць і не хоча асуджаць напад і зверствы ХАМАС у паўднёвых паселішчах Ізраіля 7 кастрычніка. "Я буду нагадваць вам пра гэта", — дадаў Эрдан. Паводле яго слоў, ізраільская дэлегацыя ў ААН будзе насіць жоўтыя зоркі "да таго часу, пакуль вы не асудзіце зверствы ХАМАС і не запатрабуеце неадкладнага вызвалення нашых закладнікаў".

Армія Ізраіля ў сектары Газа тым часам упершыню вызваліла закладніцу падчас бою. Гэтую дзяўчыну ХАМАС захапіў 7 кастрычніка. Яе завуць Оры Мегідыш. Па паведамленні прэс-службы ЦАХАЛ, яна адчувае сябе добра і ўжо сустрэлася са сваёй сям'ёй.

За апошнія суткі ЦАХАЛ атакаваў у Газе каля 300 цэляў. Сярод іх — супрацьтанкавыя і ракетныя пазіцыі баевікоў, тунэлі, ваенныя комплексы, асобныя групы ХАМАС. Былі задзейнічаны авіяцыя і сухапутныя сілы. У ЦАХАЛ кажуць, што наземная аперацыя ў Газе працягваецца.

Акрамя таго, сёння раніцай інжынернае падраздзяленне ЦАХАЛа ўзарвала дом аднаго з лідараў ХАМАСа Салаха аль-Аруры ў вёсцы Арура. Аль-Аруры лічыцца адным з "архітэктараў" масіраванага нападу ХАМАСа на Ізраіль 7 кастрычніка 2023 года. Ён жыве пераважна ў Бейруце.