Кубілюс: Мяне не здзіўляе, што Мінск не згодны са словамі "акупацыя Крыма"
Былы прэм'ер-міністр Літвы пракаментаваў Еўрарадыё інфармацыю пра тое, што Беларусь блакуе падпісанне выніковай дэкларацыі Рыжскага саміта.
21 траўня ў Рызе пачынаецца саміт Усходняга партнёрства. Беларусь на ім прадстаўляе міністр замежных спраў Уладзімір Макей. Адной з інтрыг з'яўляецца тэкст праекта выніковай дэкларацыі саміта. Агенцтва Reuters сёння паведаміла пра тое, што Беларусь і Арменія, нібыта, блакуюць падпісанне дакумента з-за наяўнасці ў дакуменце фразы пра анексію Крыма.
Прысутны на саміце былы прэм'ер-міністр Літвы, лідар апазіцыі Сейма Літвы Андрус Кубілюс пракаментаваў Еўрарадыё гэтую інфармацыю:
"Напэўна, інтарэсы тых, хто сябе больш звязвае з Мытным саюзам, і інтарэсы тых, хто бачыць сваю перспектыву ў Еўрапейскім саюзе, яны адрозніваюцца... Мяне не здзіўляе, што Арменія і ўлады Беларусі не згодныя выкарыстоўваць такія словы, як акупацыя Крыма".
Што для Беларусі зменіць саміт Усходняга партнёрства ў Рызе
Нагадаем, гэтую сітуацыю Еўрарадыё раней пракаментаваў і прысутны на Рыжскім саміце прэзідэнт Украіны Пётр Парашэнка: "Я думаю, што сітуацыя з анэксіяй Крыма прызнаная ўсім светам. І калі Беларусь павінна выпрацаваць сваю пазіцыю і калі яна дастаткова нерашучая, я думаю, што гэта праблема Беларусі. Гэта не з'яўляецца праблемай Еўрапейскага саюза ці Украіны".
Саміт Усходняга партнёрства працягнецца ў пятніцу, 22 траўня.
