Лукашэнка: Калі мы гэтымі допінгамі балаваліся, то мала не падасца
Беларускі спорт мае найбольшыя шанцы на выйгрыш, калі ён будзе чыстым. Пра гэта Аляксандр Лукашэнка заявіў 27 чэрвеня на нарадзе па падрыхтоўцы беларускіх спартсменаў да Алімпійскіх гульняў у Рыа-дэ-Жанейра.
"Спорт — гэта вялікая палітыка. Вы бачыце, што адбываецца цяпер, якая ідзе барацьба. Напэўна, усё ж такі нейкі палітычны падтэкст у гэтым ёсць. Калі мы гэтымі допінгамі балаваліся, то мала не падасца. Я абсалютна за чысціню спорту. Калі хтосьці прымае забароненыя прэпараты, то з гэтым трэба змагацца. І нам гэта выгадна. Калі мы не будзем прыхільнікамі чыстага спорту, мы прайграем. Таму што буйныя дзяржавы заўсёды знойдуць магчымасць нас у гэтым перайграць. Калі чысты спорт, у нас больш магчымасцяў заваяваць медалі", — перадае БЕЛТА словы кіраўніка дзяржавы.
Лукашэнка заявіў, што ў Беларусі робіцца ўсё неабходнае для спорту высокіх дасягненняў.
Кіраўнік дзяржавы падкрэсліў, што на Алімпіядзе ў Рыа-дэ-Жанейра "турыстаў" у беларускай зборнай не будзе. Ён пацікавіўся, у якіх відах спорту ў нацыянальнай каманды ёсць рэальныя шанцы на годнае выступленне, якая колькасць і якасць ліцэнзій.
Разам з тым, ён адзначыў, што Беларусь цяпер не ставіць канкрэтныя планы на медалі, каб празмерна не ціснуць на спартоўцаў. "Аднак калі мы бачым, што шанцаў няма, ганьбіць краіну і марнаваць народныя грошы не трэба", — канстатаваў Лукашэнка.
Асобную ўвагу беларускі кіраўнік звярнуў на праблему допінгу — па яго словах, гэта палітычная праблема: "Усе мы сочым праз СМІ за тым, што спорт пераходзіць у вялікую палітычную плоскасць. Гэта датычыцца і допінгавых пытанняў, асабліва мельдонію, які стаў раптам сусветна вядомым. У сувязі з гэтым важна ведаць, ці закранула гэтая праблема нашых спартсменаў і наколькі. Хаваць нічога не трэба. Вы бачыце, пачалі калупацца ўжо ў прабірках васьмігадовай даўнасці".
Лукашэнка заявіў, што не павінна скласціся такая сітуацыя, калі ў Беларусі падчас Алімпіяды або праз некалькі гадоў пасля яе пачнуць забіраць медалі за допінг-скандалы.
