Лукашэнка разлічвае на Кітай у супрацьстаянні "па праваабарончай тэматыцы"
Кіраўнік Беларусі заявіў пра падабенства пазіцый з Кітаем па неабходнасці пабудовы шматпалярнага свету.
Таксама Аляксандр Лукашэнка пацвердзіў гатовасць Беларусі разам з КНР супрацьстаяць нападкам з боку Захаду па пытаннях захавання правоў чалавека. Заява прагучала ў пятніцу падчас сустрэчы беларускага кіраўніка з сябрам палітбюро, сакратаром палітыка-юрыдычнай камісіі ЦК КПК Мэн Цзяньчжу.
"Мы заўсёды падтрымлівалі і будзем падтрымліваць вас у плане тэрытарыяльнага адзінства Кітая, а таксама будзем супрацьстаяць разам з вамі нападкам з боку асобных сіл на Захадзе па правах чалавека і іншых пытаннях. Нам гэта тэматыка знаёмая", — перадае interfax.by словы Лукашэнкі.
Таксама ён заявіў, што ў Беларусі і Кітая "няма абсалютна ніякіх праблем з пункту гледжання бачання перспектыў развіцця сітуацыі ў свеце". "У нас адзіныя погляды на сусветны парадак дня. Кітай ідзе ў авангардзе барацьбы за шматпалярны свет, і мы таксама прытрымваемся гэтай пазіцыі", — заявіў Лукашэнка.
Фота — БЕЛТА
