Лукашэнка: Заганяць людзей на выбарчыя ўчасткі не трэба, трэба іх папрасіць
Заганяць людзей на выбарчыя ўчасткі не трэба, трэба іх папрасіць. Пра гэта заявіў Аляксандр Лукашэнка падчас сустрэчы са старшынёй Цэнтрвыбаркаму Лідзіяй Ярмошынай. Яна адбылася ў аўторак, у дзень пачатку датэрміновага галасавання на выбарах у Палату прадстаўнікоў.
Лукашэнка адзначыў, што выбары павінны быць святам для людзей, іх трэба правесці годна, без прымусу. У той жа час ён хоча, каб прыйшло прагаласаваць як мага больш людзей. І гэта было б паказчыкам сувязі "паміж уладай і народам", паказчыкам "ацэнкі людзьмі парламенцкіх выбараў".
"Падкрэсліваю: заганяць людзей на ўчасткі не трэба, трэба іх папрасіць. Трэба папрасіць, каб людзі прыйшлі і прагаласавалі", — цытуе словы Аляксандра Лукашэнкі БЕЛТА.
Кіраўнік дзяржавы сказаў Лідзіі Ярмошынай, што не трэба баяцца, што Захад дасць нізкую ацэнку выбарам з-за таго, што будзе вялікі працэнт датэрміновага галасавання. Паводле яго слоў, у іншых краінах з-за гэтага ніхто не напружваецца. "Галоўнае, каб чалавек прагаласаваў", — сказаў Лукашэнка. Ён прызнаўся, што хацеў прагласаваць датэрмінова, але перадумаў, інакш "перакуліцца свет", з'явіцца "вялізная прорва". Відаць, мае на ўвазе крытыку, якая абрынулася б на яго.
У чарговы раз Аляксандр Лукашэнка заявіў, што палітычная кампанія не павінна парушыць "мір і спакой у нашай краіне". "Таму я звяртаюся да людзей, каб яны прыйшлі і прагаласавалі на гэтых выбарах так, як лічаць патрэбным", — сказаў кіраўнік дзяржавы.
