У Віцебску за палітыку будуць судзіць жанчыну з першай групай інваліднасці
Валянціна Крыштопенка / viciebskspring.org
9 кастрычніка Віцебскі абласны суд разгледзіць крымінальную справу ў дачыненні да Валянціны Крыштопенка. Жанчыну будуць судзіць па ч. 1 арт. 361-4 КК (“садзейнічанне экстрэмізму”). Справай займаецца суддзя Галіна Бондал.
Валянціна мае інваліднасць І групы і жыве з пенсіі. Пасля выбараў у 2020 годзе яе неаднаразова штрафавалі па палітычных адміністрацыйных артыкулах. Так, у 2021-м жанчыну аштрафавалі на 1160 рублёў за фотаздымак з цытатай з Бібліі “Калі ўладарыць бязбожнік — народ стогне”. Гэта палічылі “несанкцыянаваным пікетаваннем”.
Падчас мірных маршаў у Віцебску Валянціна перамяшчалася на інвалідным вазку, бо ёй цяжка хадзіць.
