Макей пагражае Беларусі прыходам з-за мяжы "фашыствуючай дэмакратыі"

Кіраўнік МЗС кажа, што ў Беларусі, можа быць, не ўсё ідэальна і ёсць што ўдасканальваць. Але рабіць гэта трэба не пад дыктоўку знешніх куратараў, не пад ціскам вуліцы і не праз рэвалюцыю, а ў рамках закона.

Як вядома, масавыя вулічныя акцыі пачаліся ў Беларусі пасля выяўлення фальсіфікацыяў на выбарах, што з'яўляецца прамым парушэннем закона. Фальсіфікацыі не былі прызнаныя з боку ўладаў. Супраць удзельнікаў мірных пратэсных акцыяў адразу ж ужываліся святлошумавыя гранаты і траўматычная зброя.

Прадстаўнікоў апазіцыі Макей абвінаваціў у імкненні разбурыць дзяржаву і ў "фашыствуючых" настроях.

"Хто ствараць будзе і якім чынам мы будзем ствараць новую дзяржаву на руінах разбуранага — адказу ад апанентаў улады я, на жаль, да гэтага часу не пачуў. Санкцыі, прыбраць, знішчыць, змесці і гэтак далей і таму падобнае. Ведаеце, сёння я называю гэта "бясчынствуючая" дэмакратыя, я ведаю, што пасля гэтага шэраг выпадаў у мой адрас будзе гучаць, але ведаючы многіх людзей, якія знаходзяцца там, за мяжой, ведаючы, што яны кажуць і што прапануюць у дачыненні да Беларусі і беларускага народа, я перакананы, што ў выпадку прыходу такіх людзей да ўлады гэта будзе фашыствуючая дэмакратыя", — заявіў міністр.