Міліцыя — мінчанцы: а бчб у вас няправільны — "Пагоня" павінна быць асобна

Незвычайную гісторыю пра бел-чырвона-белы сцяг, вывешаны на Дзень Волі, распавяла ў Фэйсбуку мінчанка Аляксандра Багуслаўская. 

25 сакавіка яны з мужам вывесілі на гаўбцы нацыянальны сцяг, каб адзначыць свята. Праз некалькі гадзін у кватэру пазванілі міліцыянты, але дзяўчына ім не адчыніла. Па яе словах, міліцыя не вельмі настойвала на візіце і неўзабаве сышла. 

Працяг гісторыя атрымала 30 сакавіка. 

"Мы ўжо і думаць забыліся пра гэты інцыдэнт, як сёння майму мужу паступіла тэлефанаванне з просьбай з'явіцца ў РУУС Заводскага раёна і даць тлумачэнні наконт сцяга на балконе. І паколькі ў каранцін нават паход у міліцыю — гэта забаўка, на просьбу нашых праваахоўнікаў мы вырашылі адгукнуцца.

Следчы адразу спытаў: "Свята адзначалі, так? Тады ж БНР утварылася?" Мы вельмі ўзрадаваліся, што наша міліцыя ў курсе такіх важных дат у гісторыі Беларусі.

Як аказалася, камусьці з суседзяў перашкодзіў БЧБ на нашым балконе, і міліцыя была вымушаная адрэагаваць на выклік. Следчы, дарэчы, адзначыў, што сцяг у мяне няправільны (!!!) — маўляў, Пагоня павінна быць асобна", — падзялілася Багуслаўская падрабязнасцямі.

Па яе словах, міліцыя не знайшла правапарушэння ў вывешванні сцяга. 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.