Мінімум два расійскія "Шахеды" ўночы на 27 кастрычніка "зайшлі" ў Беларусь
"Шахед" / focus.ua
Уночы на 27 кастрычніка ў Беларусь з Украіны заляцелі мінімум два расійскія "Шахеды". Звесткі з маніторынгавых груп вывучыў "Беларускі Гаюн".
Першы дрон-камікадзэ прайшоў па "шахедабане" Славуціч — Чарнобыль а першай гадзіне ночы. У 00:44 ён пакінуў тэрыторыю Беларусі — вылецеў ва Украіну.
Яшчэ адзін "Шахед" зайшоў у Беларусь у 00:36 у раёне Лоева. Ён трымаў паўночна-заходні курс і знік недзе ў глыбіні беларускай тэрыторыі. Гэта пацвярджаюць і ВПС Украіны, паводле інфармацыі якіх адзін БПЛА паляцеў у напрамку Беларусі.
На працягу ночы дзяжурная авіяцыя ВПС Беларусі не ўзнімалася.
