Міністрам унутраных спраў стаў Юрый Караеў
11 чэрвеня Аляксандр Лукашэнка прызначыў міністрам унутраных спраў Юрыя Караева, перадае БЕЛТА. Дагэтуль Караеў займаў пасаду намесніка міністра ўнутраных спраў — камандуючага ўнутранымі войскамі.
Напярэдадні падаў у адстаўку міністр Ігар Шуневіч. Па яго словах, ведамству неабходныя змены.
Прызначаючы Караева на пасаду міністра, кіраўнік дзяржавы звярнуў увагу на праблему дысцыпліны ў міліцэйскіх шэрагах. "Скажам шчыра, міліцыю трэба трошкі страсянуць у плане дысцыпліны. Ну, а для гэтага які патрэбен чалавек — ваенны. Хаця вы адносна ваенны чалавек, вы і міліцыю добра ведаеце. Вы там былі ўнутры, вы бачылі гэтыя праблемы", — патлумачыў Лукашэнка.
