Палітзняволеную айцішніцу асудзілі за пратэсты на тры гады "хатняй хіміі"

17 сакавіка суддзя Заводскага раёна Мінска Жанна Хвайніцкая прысудзіла палітзняволенай Марыне Неўдах тры гады "хатняй хіміі". Таксама яна павінна выплаціць штраф, дакладны памер якога праваабаронцам пакуль невядомы.

Дзяўчыну прызналі вінаватай у злачынстве паводле ч. 1 арт. 342 Крымінальнага кодэкса (Арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх).

Марыне Неўдах 37 гадоў, яна кандыдат тэхнічнных навук. Паводле адной з адукацый — журналістка. З 2015 года працавала ў EPAM тэставальніцай праграмнага забеспячэння. Разам з мужам выхоўвала дваіх дзяцей, якім на момант яе затрымання было 9 і 11 гадоў.

У 2020 годзе мінчанку двойчы затрымлівалі і судзілі паводле адміністрацыйных артыкулаў 23.34 (Парушэнне парадку арганізацыі ці правядзення масавых мерапрыемстваў) і 23.4 (Непадпарадкаванне законнаму распараджэнню ці патрабаванню службовай асобы пры выкананні ёю службовых паўнамоцтваў). Абодва разы ёй прысуджалі штрафы. 

Па крымінальнай справе яе затрымалі 16 снежня 2021 года дома, на вачах у дзяцей. Пасля затрымання Неўдах сядзела на Акрэсціна, дзе для яе стварылі невыносныя ўмовы знаходжання. Вельмі хутка ў жанчыны пахіснулася здароўе, і яна захварэла.

Потым яе перавялі ў СІЗА №1 на Валадарскага, дзе і пратрымалі да суда.

Праваабаронцы прызналі Марыну Неўдах палітзняволенай.