Пайшоў з жыцця беларускі пісьменнік, сцэнарыст, перакладчык Алесь Жук

Увечары 15 кастрычніка памёр пісьменнік, сцэнарыст, перакладчык Алесь Жук. Пра гэта паведіміў літаратар Міхась Скобла. Алесю Жуку было 75 гадоў. Ён вядомы як аўтар вострасюжэтнай прозы, працаваў ў літаратурных газетах і часопісах Беларусі, у тым ліку ў “Маладосць”, “Полымя”, “Літаратура і мастацтва”. Таксама пераклаў на беларуску мову аповесць "Сабачае сэрца" і раман "Майстар і Маргарыта" Міхаіла Булгакава. 

— Памёр Алесь Жук, чые кнігі хочацца перачытваць. Асабліва люблю яго апавяданні, дзе ўсё да месца, усё суладна —  і мова, і адносіны герояў, і ўмельства карыстацца метафарай, якое Міхась Стральцоў называў святам у будзень, — піша Скобла. — Алесь Жук для мяне майстар прозы ў класічным бунінскім разуменні. Апошнім часам пісьменнік даводзіў да ладу кнігу мемуарных эсэ пра тых, з кім яго зводзілі жыццёвыя дарогі. Дзейнымі асобамі той кнігі меліся стаць Мікалай Улашчык, Васіль Быкаў, Анатоль Кудравец, Яўгенія Янішчыц, Юрка Голуб... З Голубам яны сябравалі са студэнцкіх гадоў, і Алесь Аляксандравіч быў маім незаменным кансультантам падчас падрыхтоўкі Голубавай кнігі “Дыханне трыснягоў”. Радаваўся, калі яна нядаўна выйшла — з ягоным сяброўскім пасляслоўем…

Развітанне з Алесем Жуком адбудзецца 17 кастрычніка у рытуальнай зале на вул. Куляшова, 49, з 12.00 да 13.00.