Першы блок БелАЭС паставілі на рамонт
Першы энергаблок Беларускай АЭС выведзены ў планава-папераджальны рамонт, паведамляе прэс-служба Міністэрства энергетыкі ў сваім ТГ-канале.
Такія тэхналагічныя работы, адзначаюць у Мінэнерга, штогод праводзяцца на атамных станцыях, каб забяспечыць стабільны працоўны стан абсталявання.
Плануецца правесці рамонт абсталявання рэактарнай устаноўкі, у тым ліку парагенератараў, кампенсатара ціску, галоўных цыркуляцыйных помпаў і турбагенератара. Таксама запланаваны кантроль металу і дыягностыка зварных злучэнняў абсталявання рэактара і трубаправодаў сістэм, важных для бяспекі энергаблока.
Акрамя таго, у рэактар часткова перазагрузяць свежае ядзернае паліва.
Першы энергаблок БелАЭС уключыылі ў аб'яднаную энергасістэму 3 лістапада 2020-га, а ўвялі ў прамысловую эксплуатацыю 10 чэрвеня 2021 года. За гэты час энергаблок некалькі разоў адключалі. Найбольш працяглы тэрмін адключэння быў з 12 ліпеня па 4 кастрычніка 2021-га — амаль чатыры месяцы.
