Прэм'ер раскрытыкаваў падначаленых за "зрыў паказчыкаў"

Пра гэта было заяўлена 6 жніўня на паседжанні Савета міністраў, паведамляе БЕЛТА.

Міністэрства прамысловасці ён раскрытыкаваў за падзенне экспарту і аб'ёмаў вытворчасці. Пры тым  што расце дэбіторская і крэдыторская запазычанасць прадпрыемстваў. Міністэрства недастаткова эфектыўна вырашае праблемы разгрузкі складскіх запасаў. Не выконваюцца заданні па прыцягненні прамых замежных інвестыцый. Прэм'ер-міністр прапанаваў прыняць кадравыя рашэнні.

Крытыка прагучала і на адрас канцэрнаў "Белнафтахім" і "Беллегпрам".

Больш эфектыўнай працы ўрад, па словах Мясніковіча, чакае і ад аграпрамысловага комплексу. За апошнія два з паловай гады ў АПК укладзена 5 мільярдаў долараў інвестыцый. Аднак належнай аддачы як па валавых, так і па паказчыках эфектыўнасці галіны няма.

Раскрытыкаваў кіраўнік урада і сітуацыю ў рэгіёнах. Па яго словах, праз невыкананне заданняў па росце валавага рэгіянальнага прадукта (ВРП) усімі рэгіёнамі краіны за першае паўгоддзе недаатрымана 20 трыльёнаў рублёў. Замест практычнага выпраўлення сітуацыі кіраўнікі абласцей звяртаюцца ва ўрад з просьбай вылучыць дадатковыя сродкі на рашэнне назапашаных праблем.

Фота — bymedia.net