Расійскі вайсковы эшалон з ракетнага палігона прыбыў на базу Крычаў-6

Напрыканцы снежня 2025 года на тэрыторыю былой авіябазы Крычаў-6 прыбыў вайсковы эшалон з Расіі, адпраўлены са станцыі Капусцін Яр. Пра гэта паведамляе "Супольнасць чыгуначнікаў Беларусі".

Паводле стану на сярэдзіну мая 2026 года дастаўлены кантынгент аб’ект не пакідаў, зваротная адпраўка тэхнікі не фіксавалася. Новых эшалонаў у гэтым кірунку пасля снежня 2025 года таксама не паступала.

Капусцін Яр — гэта раён 4-га палігона Міністэрства абароны РФ у Астраханскай вобласці, які выкарыстоўваецца для выпрабаванняў ракетных сістэм, у тым ліку балістычных. Паводле наяўных даных, менавіта адтуль ажыццяўляліся пускі па тэрыторыі Украіны, уключаючы прымяненне балістычнай ракеты сярэдняй далёкасці "Арэшнік".

Паводле інфармацыі супольнасці, эшалон прыбыў прыблізна ў перыяд з 20 па 29 снежня 2025 года. Станцыяй прызначэння ў перавозачных дакументах значыўся Крычаў I Магілёўскага аддзялення Беларускай чыгункі.

Адпраўніком выступаў 4-ы Дзяржаўны цэнтральны міжвідавы палігон Міністэрства абароны РФ (в/ч 15644), атрымальнікам — Упраўленне ваенных паведамленняў Узброеных Сіл Рэспублікі Беларусь.

Састаў уключаў больш за 61 вагон: 54 платформы з тэхнікай, 6 крытых вагонаў са снаражэннем, 1 крыты вагон з выбуховымі матэрыяламі, а таксама пасажырскія вагоны з асабовым складам.

Раней "Супольнасць чыгуначнікаў Беларусі" паведамляла, што на тэрыторыі Крычава-6 пад выглядам "лагістычнага цэнтра" была створана чыгуначная інфраструктура для прыёму вайсковых грузаў па-за межамі публічных станцыйных пляцовак.