Прыбытак прыватных правайдэраў знізіўся на 60%, а Белтэлекама — узрос

08/04/2009 - 17:29

Еўрарадыё даведалася, на што скардзіліся прыватныя правайдэры ў лісце ў Міністэрства сувязі Еўрарадыё паразмаўляла з прадстаўніком аднаго з правайдэраў, які пажадаў пакуль не называць публічна свайго імя, каб не зашкодзіць справе і не паўплываць на адказ з міністэрства. Па яго словах, апошнім часам прыбытак прыватных правайдэраў знізіўся ажно на 60%:

Правайдэр: “Прыбытак Белтэлекама, якому мы плацім у доларах, павялічыўся на 60%. А мы пры мінус 60% прыбытку не можам вытрымаць на рынку”.

У лісце правайдэры пералічваюць галоўныя свае праблемы: разлікі ў доларах з Белтэлекамам, у некалькі разоў завышаныя цэны на паслугі, якія яны выкупляюць у Белтэлекама, перакрыжаванае субсідаванне.

Белтэлекам завышаныя цэны на інтэрнэт тлумачыць так, што трэба бабулькам у далёкія вёскі тэлефоны праводзіць. На што правайдэры скардзяцца, быццам некалькі гадоў існуе спецыяльны фонд абслугоўвання электрасувязі. З гэтага фонду кампенсуюцца страты Белтэлекама на ўсталяванне новых тэлефонных ліній. У гэты фонд робяць адлічэнні ўсе правайдэры і мабільныя аператары. Атрымліваецца падвойнае падаткаабкладанне!

Правайдэр: “У нас засталося перакрыжаванае субсідаванне, ёсць гэты фонд. То бок два падаткі. Усе туды плацяць, а карыстаецца толькі Белтэлекам і Белпошта”.

У прэс-службе Белтэлекаму кажуць, што цэны на паслугі, якія яны прадаюць правайдэрам, не супярэчаць законам. Дый становішча прыватнікаў не лічаць нявыгадным:

Супрацоўніца прэс-службы Белтэлекама: “Гэты вывад галаслоўны. У цэлым цэнаўтварэнне праводзіцца ў строгай адпаведнасці з заканадаўствам”.

Правайдэры кажуць, што яны патрэбныя не менш, чым Белтэлекам.

Правайдэр: “Тэлекамунікацыйная галіна — гэта вены, па якіх цячэ кроў. Якую б задачу ні ставілі перад спартоўцам, калі яго крывяносная сістэма забітая або неразвітая, то ён ніколі не паставіць рэкордаў і ніколі не вырасце з маленькіх штанцоў”.

Цікава, што рэгіянальныя правайдэры далучыцца да ліста ў міністэрства не пажадалі. Як зазначылі ў адной з брэсцкай кампаніі, такія лісты нічога не зменяць:

Супрацоўніца CityLine: “Канешне, мы не з усім згаджаемся, але лістоў не падпісвалі. Цяжкі бізнес, але калі не падабаецца, то ідзіце ў аптовы гандаль, а то яны лісты пішуць. У Мінску і так правайдэрам лягчэй, з іх і грошай менш бяруць”.

Дарэчы, ліст у міністэрства правайдэры адсылалі ўжо даволі даўно. Адказу пакуль не атрымалі.

Краіна	Правайдэр	Хуткасць (Увах/Зых)	Кошт (у разліку на беларускія рублі)
Польшча	Aster	10 Мбіт / 1 Мбіт	128 тыс. руб.
Украіна	ЦИФРА	10 Мбіт / 2 Мбіт	340 тыс. руб.
Расія	АКАДО Телеком	10 Мбіт / 1 Мбіт	55.300 руб.
Англія	O2	8 Мбіт / 8 Мбіт	30 тыс. руб.
Сінгапур	SingTel	8 Мбіт / 8 Мбіт	93 тыс. руб.
Італія	TelecomItalia	8 Мбіт / 2 Мбіт	160 тыс. руб.
Чэхія	Volny	8 Мбіт / 0.5 Мбіт	90 тыс. руб.
Літва	Zebra	6 Мбіт / 6 Мбіт	103 тыс. руб.
Нямеччына	1&1	5 Мбіт / 1 Мбіт	53.600 руб.
Францыя	Domaccess	4 Мбіт / 4 Мбіт	157 тыс. руб.
Беларусь	Белтэлекам	1 Мбіт / 0.5 Мбіт	980 тыс. руб.