Расія дамаглася, каб Беларусь транспартавала нафтапрадукты праз расійскія порты
Расія дамаглася, каб Беларусь транспартавала нафтапрадукты праз расійскія порты. Ужо заключаны кантракт на пастаўку партыі нафтапрадуктаў (72 тысячы тон), паведаміў старшыня “Белнафтахіму” Ігар Ляшэнка. Паводле яго слоў, пакупнік з Расіі, пастаўка будзе адбывацца ў снежні і студзені.
Адказваючы на пытанне, ці выгадна гэта Беларусі, Ляшэнка адзначыў, што ў гэтым зацікаўленыя абодва бакі. “Гэта прыклад нармальнага ўзаемавыгаднага супрацоўніцтва”, — цытуе словы старшыні “Белнафтахіму” БЕЛТА. Ігар Ляшэнка адзначыў, што калі эканамічныя ўмовы Беларусі будуць выгадныя, у 2018-м экспарт нафтапрадуктаў з нашай краіны праз расійскія порты можа скласці да 1 млн тон.
Як вядома, расійскі бок у апошнія гады дамагаўся, каб беларусы пагадзіліся на пастаўкі нафтапрадуктаў праз расійскія порты. Аднак Мінск не здаваўся, працягваў пастаўкі праз краіны Балтыі. Аднак у жніўні 2017-га кіраўнік Расійскай чыгункі Алег Белазёраў на адной з нарад паскардзіўся Уладзіміру Пуціну, што Беларусь адмаўляецца ад яго паслуг па перавозцы нафтапрадуктаў з НПЗ у порты Усць-Лугі і Санкт-Пецярбурга. Нават нягледзячы на 50%-я зніжкі.
Пуцін выказаўся жорстка. Ён сказаў, што пастаўкі расійскай нафты ў Беларусь трэба прывязаць да транспарціроўкі нафтапрадуктаў праз Расію. Расійскі прэзідэнт падкрэсліў, што акрамя нафты з Расіі іншай у Беларусі на нафтаперапрацоўчых заводах няма і яна “наўрад ці з’явіцца”. Можна меркаваць, што ўлады Беларусі часткова пагадзіліся на патрабаванні расіян і цалкам ад інфраструктуры краін Балтыі не адмовіліся.
