Расіянін вёз з Польшчы ў Беларусь амаль 300 кг гашышу ў "Лексусе"

Супрацоўнікі Гродзенскай рэгіянальнай мытні спынілі спробу прывезці ў нашу краіну амаль 300 кг гашышу.

Гэта ўжо трэцяя сёлета спроба завезці на тэрыторыю Еўразійскага эканамічнай саюза буйную партыю наркотыкаў, спыненая беларускімі мытнікамі, перадае customs.gov.by.

56-гадовы кіроўца аўтамабіля "Лексус" 2015 года выпуску ехаў з Польшчы праз пункт пропуску "Брузгі". Для перасячэння мяжы ён выбраў "зялёны калідор". Аднак выкарыстанне інспекцыйна-нагляднага комплексу і кіналагічнай службы паказалі, што ў аўтамабілі ёсць наркатычныя рэчывы.

У хованках у падлозе і пад дном аўтамабіля мытнікі знайшлі 372 брыкеты з рэчывам расліннага паходжання карычневага колеру. Дабрацца да хованак можна было, толькі разабраўшы аўто з выкарыстаннем электраінструментаў.

Судэксперты выявілі, што спрэсаванае рэчыва з'яўляецца гашышам. Агульная вага брута грузу склала каля 300 кг.

На расіяніна-кіроўцу пачалі крымінальную справу. За незаконнае перамяшчэнне праз мытную мяжу наркатычных сродкаў яму пагражае да 10 гадоў пазбаўлення волі з канфіскацыяй маёмасці або без канфіскацыі.

Матэрыялы справы перададзеныя ва Упраўленне Следчага камітэта па Гродзенскай вобласці.