Рэдакцыі СМІ і БАЖ патрабуюць спыніць пераслед журналістаў

22/06/2020 - 15:29

ГА "Беларуская асацыяцыя журналістаў" і рэдакцыі СМІ выступілі з сумеснай заявай, у якой запатрабавалі спыніць пераслед журналістаў і абмежаванне свабоды выказвання.

Як гаворыцца ў заяве, за два дні — 19 і 20 чэрвеня — падчас выканання прафесійных абавязкаў былі затрыманыя як мінімум 14 журналістаў. Як распавядала Еўрарадыё, 19 чэрвеня былі затрыманыя нашыя журналісты Марыя Вайтовіч і Арцём Маёраў.

"Прычым большасць з затрыманых мелі пасведчанні журналістаў, як таго патрабуе заканадаўства аб СМІ, і гатовыя былі прад'явіць іх па патрабаванні, а таксама былі вельмі прыкметна абазначаныя як супрацоўнікі СМІ адпаведнымі камізэлькамі і бэйджамі.

Некаторыя з затрыманых журналістаў, у прыватнасці Аляксандр Пазняк і Сяргей Багроў, былі збітыя падчас затрымання ў Ганцавічах. Прычым напады (складана падабраць іншае слова) супрацоўнікаў міліцыі на журналістаў часцяком адбываліся ў прамым эфіры, і парушэнні правоў журналістаў былі відавочнымі", — гаворыцца ў заяве.

Згодна з артыкулам 34 Закона Беларусі "Аб сродках масавай інфармацыі", журналіст у сувязі з ажыццяўленнем прафесійных абавязкаў мае права прысутнічаць на масавых мерапрыемствах, у месцах іншых грамадска важных падзей і перадаваць адтуль інфармацыю. На думку аўтараў заявы, супрацоўнікі сілавых структур груба парушылі правы журналістаў.

Падпісанты патрабуюць ад кампетэнтных дзяржаўных органаў:

"— строга выконваць арт. 33 і 34 Канстытуцыі Рэспублікі Беларусь, якія гарантуюць свабоду выказвання меркавання, права на атрыманне і распаўсюд інфармацыі і забарону цэнзуры;

— спыніць пераслед журналістаў недзяржаўных СМІ, фрылансераў і журналістаў замежных СМІ за выкананне імі сваіх прафесійных абавязкаў;

— роўнага стаўлення ў частцы акрэдытацыі, даванні інфармацыі і строгага выканання арт. 13 Канстытуцыі Рэспублікі Беларусь, які гарантуе ўсім роўныя правы і роўныя магчымасці свабоднага выкарыстання здольнасцяў і маёмасці для прадпрымальніцкай і іншай незабароненай законам эканамічнай дзейнасці;

— спыніць сегрэгацыю СМІ пры забеспячэнні права на доступ і распаўсюд інфармацыі на дзяржаўныя і недзяржаўныя, пажаданыя і непажаданыя, зручныя і нязручныя, што прадугледжана арт. 13, 33, 34 Канстытуцыі;

— спыніць перашкоду законнай прафесійнай дзейнасці журналістаў".

Таксама яны патрабуюць прыцягнуць да адказнасці тых, хто перашкаджаў дзейнасці журналістаў у адпаведнасці з артыкулам 198 Крымінальнага кодэкса.

Заяву падпісалі:

ГА “Беларуская асацыяцыя журналістаў”

Інфармацыйнае агенцтва "БелаПАН"

Радыё "Свабода"

Беларускі партал TUT.BY

"Народная Воля"

Інтэрнэт-часопіс CityDog.by

"Новы Час"

"Наша Ніва"

"Комсомольская правда в Беларуси"