Арамнаў: У Беларусі я са сваімі рэкордамі нікому не патрэбны!

“Не хочуць, каб я выступаў увогуле, – абураецца спартовец. – У Беларусі я са сваімі месцамі і рэкордамі нікому не патрэбны! Нікому гэта не цікава. І мне таксама стала нецікава. Бо пасля таго, як я выступіў на чэмпіянаце Еўропы, я паехаў дамоў, і пра мяне забыліся. Ніводнага разу ніхто не патэлефанаваў, акрамя асабістага трэнера… Хіба што ён пытаўся, як справы”.

У песімізма Арамнава ёсць падставы. Беларускі штангіст прапускае чэмпіянат свету, які гэтымі днямі праходзіць у Турцыі. Па словах спартоўца, узяць удзел у мерапрыемстве яму перашкодзіла паўгадавая дыскваліфікацыя. Яна пачалася неўзабаве пасля таго, як далі станоўчы вынік допінг-спробы, узятыя пасля красавіцкага чэмпіянату Еўропы, што адбыўся ў Мінску.

Андрэй Арамнаў: “Я ж, здаецца, папаўся ў Мінску пасля чэмпіянату Еўропы. І дыскваліфікавалі мяне на паўгода. Але вось што мяне абурае: ніхто не тэлефануе, нічога не паведамляе… Проста “папрасілі” мяне са збораў, і ўсё.

Але ўжо 6 снежня я вяртаюся!”

Праўда, словы штангіста абвяргае дырэктар Нацыянальнага антыдопінгавага агенцтва Аляксандр Ванхадла:

“Ні пра якія дыскваліфікацыі пакуль што казаць нельга. У мяне ніякіх дакументаў няма, і, наколькі я ведаю, у нашых штангістаў няма. Цяпер ідзе чэмпіянат свету, падчас якога будзе адбывацца пасяджэнне міжнароднай дысцыплінарнай камісіі, якая і будзе разглядаць пытанні санкцыяў за допінг. Шанец на дыскваліфікацыю ў Арамнава ёсць: усё будзе залежаць ад таго, ці прызнае камісія правільным праведзенае даследаванне спробаў. Калі прызнае, што ўсё там добра – натуральна, будзе ставіцца пытанне пра санкцыі”.

Пакуль збіраецца дысцыплінарная камісія, Арамнаў амаль не трэніруецца і набірае вагу.

“Я перапыніў трэніроўкі. Але падтрымліваю ўвесь час форму, – распавядае Арамнаў. – Я сам па сабе нармальны моцны мужычок такі. Я займаюся спортам, таму што мне гэта падабаецца. Займаюся з дзяцінства. І як па мне, дык я ўвесь час займаўся спортам для сябе, для свайго настрою. Бо мне гэта падабаецца.

Апошнім часам, калі я выступаў, я выходзіў у вагавой катэгорыі да 105 кг. Але зараз наспеў час пераходзіць у іншую катэгорыю. Бо цяпер я важу пад 110 кг і адчуваю сябе вельмі добра”.

Па словах Арамнава, каб набраць аптымальную форму, штангісту спатрэбіцца 2-3 месяцы. Але, цалкам магчыма, што вярнуцца ў снежні ў вялікі спорт Арамнаву перашкодзіць чарговы скандал.

У жніўні 2010 года супрацоўнікі ДАІ ў трэці раз злавілі барысаўскага штангіста за рулём нападпітку. Летась цяжкаатлет быў пазбаўлены права кіраваць аўтамабілем. Але, як піша газета "Прессбол", 2 жніўня ён кіраваў аўтамабілем "Audi-ТТ", "знаходзячыся ў стане алкагольнага ап'янення".

“Так, пра гэта я ведаю, – распавёў Арамнаў. – Ну дык а што ж… Калі я звычайны чалавек – чаму ж мне не патрапіцца…”

22 верасня суд аштрафаваў Арамнава на 3,5 тысячы долараў.

Крыху раней стала вядома, што Арамнаў "запаліўся" і на ўжыванні наркотыкаў. Са спасылкай на сайт "Польская штанга" той жа "Прессбол" паведамляе, што ў допінг-пробе Арамнава, узятай пасля чэмпіянату Еўропы па цяжкай атлетыцы, знайшлі сляды марыхуаны.

“Што там знайшлі?! Нічога сабе, першы раз чую пра гэта! – Абураецца Арамнаў. – Марыхуану ніколі ў жыцці не каштаваў, кажу шчыра!”

Марыхуана забароненая спартовымі органамі толькі ў перыяд спаборніцтваў, таму беларускі штангіст можа пазбегнуць санкцыяў па гэтай справе.