Беларусь пра даклад ААН: Прыклад найгоршай практыкі падрыхтоўкі дакументаў
Беларуская дэлегацыя рэзка раскрытыкавала даклад ААН і звінаваціла самога Вярхоўнага камісара.
Старшыня беларускай дэлегацыі Міхаіл Хвастоў назваў даклад па Беларусі неаб'ектыўным ды скажоным і нават звінаваціў Вярхоўнага камісара ў парушэнні нормаў міжнароднага права.
Міхаіл Хвастоў: "Даклад змяшчае высновы і рэкамендацыі, якія парушаюць абавязак Вяхоўнага камісара паважаць нацыянальную юрысдыкцыю дзяржавы, супярэчыць Уставу ААН і рэзалюцыям Генеральнай Асамблеі". Хвастоў таксама назваў падрыхтаваны міжнароднымі спецыялістамі дакалад "прыкладам найгоршай практыкі падрыхтоўкі дакументаў у Савеце ААН па правах чалавека".
Беларускую дэлегацыю падтрымалі калегі Кубы, Ірана, Зімбабвэ, Казахстана, Расіі. Прадстаўнік апошняй назваў даклад "замоўленым і палітызаваным".
А вось краіны Захаду пагадзіліся з высновамі даклада пра сістэматычнае пагаршэнне прававой сітуацыі ў краіне і выступілі за прызначэнне спецдакладчыка па Беларусі.
Нагадаем, што даклад па сітуацыі з правамі чалавека ў Беларусі прадставіла ў Жэневе Вярхоўны камісар ААН Наванэтэм Пілай, пасля чаго ў Савеце ААН адбылася інтэрактыўнай дыскусія замежных дэлегацый.
