Фанаты "Дай Дарогу!" сабралі за гурт грошы на штраф
Прыхільнікам спатрэбілася ўсяго тры дні, каб назбіраць музыкам мільён рублёў.
Нагадаем, што кіраўніца аддзела па справах моладзі Брэсцкага гарвыканкаму падала ў суд на музыкаў пасля скандалу, які разгарэўся падчас забароны некалькіх канцэртаў гурта. Суд Ленінскага раёна Брэста вынес прысуд: рок-музыкі лічацца вінаватымі ў абразе Таццяны Барышчык і павінны выплаціць ёй грашовую кампенсацыю ў памеры 10 базавых велічынь.
У акцыі салідарнасці — матэрыяльнай дапамозе "ДД!" — прынялі ўдзел каля 30 чалавек. Рэкорд сярод плацяжоў на рахунак гурта — 500 тысяч рублёў ад аднаго з неабыякавых прыхільнікаў.
Са словаў лідара брэсцкіх панк-рокераў Юрыя Стыльскага, музыкі не спыняцца на віртуальных падзяках за салідарнасць:
"Хочам зрабіць акустыку. Зараз рыхтуем новую праграму з яшчэ адным гітарыстам. Пачнем з Брэста, калі атрымаецца, а далей — на Мінск… "
Як таксама адзначыў Стыльскі, ужо ў гэтым месяцы "выйдзе сур'ёзнае відэа" — доўгачаканы канцэртны DVD "Дай Дарогу!".
