Гандляр спайсам: Прадаём далей. Нас ужо прымалі пару разоў. Але ўсё — гуд

Чакалася, што новы закон “Аб наркатычных сродках, псіхатропных рэчывах, іх прэкурсорах і аналагах” ударыць па гандлярах легальных наркотыкаў.

Новае паняцце “аналагі”, думалася, дапаможа забараніць сотні новых хімічных соляў, парашкоў і спайсаў, якія ледзь не штодня прадукуюцца  ў кітайскіх наркалабараторыях.

Пад выглядам соляў, міксаў, спайсаў, парашкоў і інш. прадаюць небяспечныя хімічныя псіхатропы, якія ўдыхаюцца, курацца ці нават уводзяцца ў вену. Але ўносіць у “Рэспубліканскі пералік” іх аператыўна не паспяваюць. Таму псіхатропы цягам пэўнага часу распаўсюджваюцца, а дылеры не нясуць за гэта крымінальнай адказнасці.

Закон набыў моц напрыканцы кастрычніка, і тут жа сотні наркасуполак з беларускага інтэрнэта былі выдалены самімі ж стваральнікамі. Барыгі, баючыся рэальных тэрмінаў, заселі ў акопе.

Але днямі некаторыя наркасуполкі пачалі зноўку працаваць. Гандляры ізноў не баяцца пакідаць свае тэлефонныя нумары і дамаўляцца наконт сустрэчаў. Набіраем адзін з нумароў.

Малады голас абяцае прадаць паўграма парашку:

1_6.mp3

“120 тысяч. Але, калі тэрмінова, можам табе зрабіць за сотку”.

Еўрарадыё: А вы дзе знаходзіцеся?

“Праз гадзіну буду на Чыжоўцы”.

Еўрарадыё: Гэта “легалка” (псіхатроп, які пакуль не ўнесены ў Рэспубліканскі наркапералік. — Еўрарадыё) ці не?

“Гэта не “легалка”. Мы робім “закладку”. Ты нам кладзеш у адным месцы грошы, мы табе даем адрас — ты ідзеш, забіраеш. Гэта ўсё хутка, цягам максімум 10-15 хвілін. Мы правяраем, ці паклаў ты грошы. Мы тэлефануем ці sms адпраўляем: нумар дома, пад’езд. І ты забіраеш усё”.

Яшчэ раз цікавімся, ці ўнесены наркатавар у Рэспубліканскі пералік. Дылер нечакана сцвярджае, што, купляючы любы парашок, соль ці спайс, мы рызыкуем турэмным тэрмінам:

2_6.mp3

“Так, “легалак” няма. Калі табе ёсць 18, то 12 гадоў атрымаеш. Давай ты мне пазней набярэш, калі вырашыш, браць ці не”.

У сацыяльных сетках без цяжкасцяў знаходзім яшчэ аднаго дылера. Гэты ўжо запэўнівае, што распаўсюджвае цалкам “бяспечны” тавар.

“Я ўпэўнены ў тым, што раблю. Ужо прымалі пару разоў. Усё — гуд”.

Еўрарадыё: У чым тавар? Парашок?

“Не, траўка. На чай падобная... “

Пра канкрэтна заведзеныя справы “па аналагах” пакуль не абвяшчаецца. Крыніца ў адным з абласных упраўленняў па наркаконтролі і супрацьдзеянні гандлю людзьмі МУС патлумачыла Еўрарадыё, што  тэрмін “аналаг” не дазваляе прылічваць усе новыя сродкі кшталту соляў і парашкоў да наркотыкаў. Але ў будучыні новаўвядзенне дазволіць больш хутка папаўняць "Рэспубліканскі пералік".

Раней у Дзяржаўным экспертна-крыміналістычным цэнтры МУС паведамлялі, што толькі каля паловы ўсіх рэчываў, якія ўносяцца ў “Пералік”, з’яўляюцца структурнымі аналагамі ўжо уключаных раней наркотыкаў і псіхатропаў.   

Выходзіць, што змены ў закон па вялікім рахунку не зрабілі на беларускім наркарынку рэвалюцыі.

А суполкі ў сацыяльных сетках, дзе прадаюць “дызайнерскія наркотыкі”, дагэтуль не навучыліся своечасова блакаваць.